ملک میں گڈ گورننس کے لیے اداروں میں میرٹ کی بالادستی بہت ضروری ہے‘گورنرپنجاب

لاہور (اُردو پوائنٹ اخبارتازہ ترین - این این آئی۔ 12 فروری2024ء) گورنر پنجاب محمد بلیغ الرحمان سے گورنر ہائوس لاہور میں چیئرمین پنجاب پبلک سروس کمیشن لیفٹیننٹ جنرل (ر)ملک ظفر اقبال نے الوداعی ملاقات کی۔سیکرٹری پنجاب پبلک سروس کمیشن افضال چوہدری بھی ان کے ہمراہ تھے۔ گورنر پنجاب نے لیفٹیننٹ جنرل(ر)ملک ظفر اقبال کو تین سالہ کامیاب معیاد عہدہ کی تکمیل پر مبارکباد دی اور ان کی بطور چیئرمین پنجاب پبلک سروس کمیشن کارکردگی کو سراہا۔

ملاقات کے دوران چیئرمین پی پی ایس سی نے گورنر پنجاب کو محکمہ کی سالانہ رپورٹ 2023 پیش کی۔اس موقع پر گفتگو کرتے ہوئے گورنر پنجاب محمد بلیغ الرحمن نے کہا کہ میرٹ اور شفافیت کو یقینی بنا کر ہی ہم اداروں کو مستحکم کرسکتے ہیں۔انہوں نے کہا کہ ملک میں گڈ گورننس کے لیے اداروں میں میرٹ کی بالادستی بہت ضروری ہے۔

(جاری ہے)

گورنر پنجاب نے کہا کہ مختلف آسامیوں پر میرٹ پر بھرتیاں کر کے حق داروں تک ان کا حق پہنچانا پنجاب پبلک سروس کمیشن کی ذمہ داری ہے۔

انہوں نے کہا کہ پنجاب پبلک سروس کمیشن ایک مستند ادارہ ہے جو سرکاری ملازمتوں کے لیے میرٹ پر اہل اور قابل امیدواروں کا انتخاب کرنے میں کلیدی کردار ادا کررہا ہے۔ گورنر پنجاب نے مزید کہا کہ ادارے کی کارکردگی اور بہتری کے لئے مزید اقدامات اٹھانے بالخصوص انفارمیشن ٹیکنالوجی کے فروغ کی ضرورت ہے۔چیئرمین پنجاب پبلک سروس کمیشن لیفٹیننٹ جنرل (ر)ملک ظفر اقبال نے گورنر پنجاب کو ادارے میں بہتری کے لیے کی گئی اصلاحات کے بارے میں آگاہ کیا۔

انہوں نے کہا کہ پنجاب پبلک سروس کمیشن کی استعداد کار میں اضافے کے لیے آٹومیشن اور آئی ٹی کو فروغ دیا ہے۔انہوں نے کہا کہ پنجاب پبلک سروس کمیشن کے ذریعے پہلی دفعہ درجہ چہارم کی آسامیوں پر تحریری امتحان اور انٹرویو کے ذریعے میرٹ پر شفاف طریقے سے بھرتیاں کی گئی ہیں۔ انہوں نے کہا کہ پنجاب پبلک سروس کمیشن میں کمپیوٹرائزڈ ٹیسٹنگ کے نظام کا طریقہ کار وضع کرلیا گیا ہے اور جلد ہی اس کا ٹرائل شروع کر دیا جائے گا۔