ش*پارٹی میں تمام فیصلے جمہوری مرکزیت کی بنیاد پر کئے جاتے ہیں، نیشنل پارٹی

ث*کوئٹہ (اُردو پوائنٹ اخبارتازہ ترین - آن لائن۔ 10 مارچ2024ء) نیشنل پارٹی کے مرکزی ترجمان نے بیان میں کہا کہ پشتونخواہ میپ کے سربراہ محمود خان اچکزئی بحیثیت بزرگ سیاستدان قابل احترام ہیں لیکن ان کی پریس سے گفتگو کا حقیقت سے دور تک کا واسطہ نہیں، ڈاکٹر عبدالمالک بلوچ نے کسی کو بھی پارٹی فیصلے سے قبل کوئی یقین دہانی کرائی اور نہ ووٹ کرنے کی بات کی۔

نیشنل پارٹی ایک سیاسی و جمہوری جماعت ہے جس کے تمام فیصلے جمہوری مرکزیت کی بنیاد پر کئے جاتے ہیں۔ پارٹی قیادت سے جب پشتونخواہ ملی عوامی پارٹی کے وفد کے رابطہ کرنے پر پارٹی قیادت نے ان کے سامنے واضع موقف رکھا کہ پارٹی کے سامنے صدارتی انتخابات کا معاملہ زیر غور ہے پارٹی جو بھی فیصلہ کریگا اس کو پریس کے ذریعے پبلک کردیا جاہیگا جبکہ 8مارچ کی شام کو طویل مشاورت کے بعد فیصلہ کیا جس کو میڈیا کے ذریعے پبلک کردیا گیا نیشنل پارٹی نے صدارتی انتخابات میں پیپلزپارٹی کے سربراہ محترم آصف علی زرداری کی حمایت کا باقاعدہ اعلان کردیا اور تمام اراکین اسمبلی کو صدر پاکستان کے لیے آصف علی زرداری کو ووٹ کرنے کی ہدایت جاری کردی۔

(جاری ہے)

صدارتی انتخاب کے بعد پریس سے گفتگو کرتے ہوئے محترم محمود خان اچکزئی نے نیشنل پارٹی کے قائد محترم ڈاکٹر عبدالمالک بلوچ کے حوالہ سے جو گفتگو کی اس کا حقیقت سے دور تک کا واسطہ نہیں بلکہ افسوسناک ہے ڈاکٹر عبدالمالک بلوچ ایسے سیاسی رہنما ہیں جس نے زندگی بھر پارٹی اداروں کے اجتماعی فیصلوں کو ترجیح دی ہے اور اپنا موقف واضع رکھا ہے پارٹی سربراہ کے حوالے سے محمود خان اچکزئی کی گفتگو غیرذمہ دارانہ، افسوسناک اور سیاسی روایات کے منافی ہے۔