سپریم کورٹ کا حلقہ پی بی 50 قلعہ عبداللہ میں پورے حلقے دوبارہ الیکشن کرانے کا حکم

پیر 18 مارچ 2024 21:24

اسلام آباد (اُردو پوائنٹ اخبارتازہ ترین - آن لائن۔ 18 مارچ2024ء) سپریم کورٹ نے بلوچستان کے حلقہ پی بی 50 قلعہ عبداللہ میں الیکشن کمیشن کا صرف چھ پولنگ سٹیشنز پر دوبارہ ووٹنگ کا حکم کالعدم قراردیتے ہوئے پورے حلقے میں دوبارہ انتخابات کا حکم دے دیا۔عدالت نے اپنے حکم میں کہاہے کہ الیکشن کمیشن آئین اور قانون کے مطابق شفاف پولنگ یقینی بنائے، یہ حکم پیرکے روزجاری کیاگیاہے۔

چیف جسٹس قاضی فائز عیسیٰ کی سربراہی میں تین رکنی بنچ نے کیس کی سماعت کی۔

(جاری ہے)

اس دوران درخواست گزار کے وکیل نے دلائل میں کہا کہ الیکشن کمیشن کی مخصوص پولنگ سٹیشنز پر 99% ٹرن آئوٹ مشکوک قرار دینے کی دلیل قابل قبول نہیں، وسیم سجاد ایڈووکیٹ نے کہاکہ حلقہ کئی پولنگ سٹیشنز پر بھی ٹرن آئوٹ 99% تھا وہاں دوبارہ ووٹنگ کا حکم نہیں دیا گیا،اے این پی کے زمرد خان نے الیکشن کمیشن کا حکم چیلنج کیا تھا،جن پولنگ سٹیشنز سے میرا موکل کامیاب ہوا صرف وہاں ری پولنگ کا حکم دیا گیا، میرے موکل زمرد خان نے حلف بھی اٹھا لیا تھا الیکشن کمیشن نے نوٹیفکیشن معطل کر دیا، جہاں زمرد خان جیتے وہاں فارم 45 اور 47 میں تضاد ہے، اس پرچیف جسٹس نے کہاکہ عدالت کو اتنی باریکیوں میں نہ لیکر جائیں، ٹربیونل بن چکے ہیں اپیل وہاں دائر کریں، عدالت بیٹھ کر چار سو الیکشن کیسز نہیں سن سکتی، فریقین رضا مند ہیں تو پورے حلقے میں دوبارہ پولنگ کروا دیتے ہیں، بعدازاںعدالت نے فریقین کی رضامندی سے حلقہ میں دوبارہ پولنگ کا حکم دیا ،پی بی 50 قلعہ عبداللہ سے اے این پی کے زمرد خان کامیاب ہوئے تھے،زمرد خان کی کامیابی جے یو آئی کے ملک نواز نے الیکشن کمیشن میں چیلنج کی تھی۔