شاہد آفریدی کے9 مئی کو ایک مبینہ بیان کی وجہ سے ان کیخلاف مہم چل رہی ہے

اسلام آباد ( اردوپوائنٹ اخبارتازہ ترین ۔ 23 مارچ 2024ء) پاکستان تحریک انصاف کے مرکزی رہنماء شیرافضل مروت نے کہا ہے کہ شاہد آفریدی کے9 مئی کو ایک مبینہ بیان کی وجہ سے ان کیخلاف مہم چل رہی ہے، شاہد آفریدی کیخلاف مہم جھوٹی اور فضول ہے، مجھے اس پر دلی افسوس ہے، پی ٹی آئی سوشل میڈیا کو چاہیے شاہد آفریدی کے بارے میں اچھی باتیں پھیلائیں۔ انہوں نے ایکس پر اپنے ٹویٹ میں کہا کہ شاہد آفریدی کیوں؟ اب شاہد آفریدی کے 9 مئی کو ایک مبینہ بیان کی وجہ سے ان کے خلاف مہم چل رہی ہے۔

میں نے شاہد آفریدی کے خلاف مجھ سے منسوب چند بیانات دیکھے۔ اس لیے ہمیں جھوٹی خبروں کی تردید کرنی چاہیے۔ مجھے شاہد آفریدی کی جانب سے ایسا کوئی بیان سامنے نہیں آیا اور ایسا لگتا ہے کہ کچھ عناصر ان کے خلاف جھوٹی خبریں پھیلا رہے ہیں۔

(جاری ہے)

شاہد آفریدی ایک زندہ لیجنڈ ہے، ایک پشتون (آفریدی) جو پاکستان کا ہیرو رہا۔ میں آفریدیوں سے ان کی بہت سی خوبیوں سے متاثر ہوں اور شہریار آفریدی اور شاہد آفریدی ہمیشہ میرے ہیرو رہے ہیں۔

میں جانتا ہوں کہ شاہد آفریدی عمران خان کو ایک خاص احترام میں رکھتے ہیں اور شاہد آفریدی کے خلاف پروپیگنڈہ ان لوگوں کا ہاتھ لگتا ہے جو ان کے ساتھ ذاتی سکور طے کرنا چاہتے ہیں۔ پی ٹی آئی کی سوشل میڈیا ٹیموں سے گزارش ہے کہ شاہد آفریدی کے بارے میں اچھی باتیں پھیلائیں۔ ہمیں مستقبل میں پی ٹی آئی کے پلیٹ فارم سے ہونے والے جھوٹے پروپیگنڈے پر بھی تیزی سے ردعمل ظاہر کرنے کی ضرورت ہے۔

افراد کے خلاف بدنیتی پر مبنی مہم میں اس طرح کی نادانستہ شرکت کو ہمیشہ جلد از جلد روک دیا جانا چاہیے۔ میں ذاتی طور پر تصدیق کرتا ہوں کہ شاہد آفریدی کے خلاف مہم جھوٹی اور فضول ہے اور مجھے اس پر دلی افسوس ہے۔ یاد رہے کہ گزشتہ دنوں اپنے ایک بیان میں شاہد آفریدی نے جعلی اکاؤنٹ اور پوسٹ بنانے والوں کو مخاطب کرتے ہوئے کہا تھا کہ اپنی توانائیاں کسی مثبت کام میں لگائیں جو کسی اور نہیں تو کم از کم ان کے اپنے لیے تو فائدہ مند ثابت ہوں، مجھے اگر کوئی بات کرنی ہو گی یا کوئی بیان دینا ہو گا اس کے لیے میڈیا اور میرا ایکس (سابقہ ٹوئٹر) ہینڈل موجود ہے۔