کراچی، رمضان المبارک میں ڈاکوئوں نے 8 شہریوں کی جان لے لی

رمضان میں اسٹریٹ کرائم کی 3 ہزار 300 سے زائد وارداتیں رپورٹ ہوئیں، مقابلوں کے دوران 4 ڈاکو ہلاک، 94 زخمی ہوئے،پولیس حکام

بدھ 27 مارچ 2024 16:20

کراچی، رمضان المبارک میں ڈاکوئوں نے 8 شہریوں کی جان لے لی

کراچی(اُردو پوائنٹ اخبارتازہ ترین - این این آئی۔ 27 مارچ2024ء) شہر قائد میں پولیس خاموش تماشائی بنی ہوئی ہے جبکہ ڈاکوئوں نے رمضان المبارک میں 8 شہریوں کی جان لے لی۔تفصیلات کے مطابق ماہ صیام میں بھی شہریوں کو امان نہ ملا، رمضان المبارک کے ابتدائی 15 روز میں شہر میں بے لگا ڈاکوئوں نے 8 کراچی کے شہریوں کی جان لے لی۔3 رمضان کو ملیر میں ڈاکوئوں نے دودھ فروش کو قتل کیا، 5 رمضان کو عیسیٰ نگری میں ڈاکوئوں نے ایک اور شہری کی جان لی، اس کے علاوہ تھانہ پاکستان بازار کی حدود میں ڈکیتی مزاحمت پر نوجوان محمد فرحان کو قتل کیا گیا۔

10 رمضان کو پاکستان بازار میں اختر مسیح پر گھر کی دہلیز پر فائرنگ کی گئی اسی روز ملیر میں ڈکیتی مزاحمت پر ڈاکوئوں نے انجینئر شعیب شفقت کو اس وقت قتل کیا جب وہ اپنی خالہ کے گھر افطاری پر پہنچا تھا۔

(جاری ہے)

13 رمضان کو نارتھ کراچی میں ڈاکوں نے دکاندار عبدالرحمان کو قتل کیا، 14 رمضان کو لیاقت آباد کا رہائشی زوہیب سرجانی ٹائون میں ڈاکوئوں کا نشانہ بنا جبکہ 15 رمضان کو اورنگی ٹائون قطر اسپتال میں خاتون ڈاکوئوں کی فائرنگ سے جاں بحق ہوئیں۔پولیس حکام کے مطابق رمضان میں اسٹریٹ کرائم کی 3 ہزار 300 سے زائد وارداتیں رپورٹ ہوئیں، مقابلوں کے دوران 4 ڈاکو ہلاک، 94 زخمی ہوئے، پولیس نے کارروائی کرتے ہوئے 148 اسٹریٹ کرمنلز کو گرفتار کیا اور 108 مختلف اقسام کے ہتھیار برآمد کیے گئے ہیں۔