اپریل میں مہنگائی کم ہو کر 21 سے 22 فیصد تک رہنے کا امکان ہے، وزارت خزانہ

مہنگائی میں اضافے کے خدشے کے باعث شرح سود کو برقرار رکھا گیا ، جاری رپورٹ

جمعہ 29 مارچ 2024 23:10

اسلام آباد (اُردو پوائنٹ اخبارتازہ ترین - این این آئی۔ 29 مارچ2024ء) وزارت خزانہ نے ماہانہ اقتصادی رپورٹ جاری کردی۔رپورٹ میں بتایا گیا کہ اپریل میں مہنگائی کم ہو کر 21 سے 22 فیصد تک رہنے کا امکان ہے۔

(جاری ہے)

وزارت خزانہ کی جاری کردہ رپورٹ کے مطابق پاکستان کی معاشی صورتحال بہتر ہو رہی ہے، بین الاقوامی مالیاتی اداروں سے فنانسنگ بحال ہو رہی ہے، آئی ایم ایف سے 1.1 ارب ڈالرز کی آخری قسط کا معاہدہ طے پا چکا ہے، حکومتی اصلاحات اور پالیسی اقدامات سے بیرونی ادائیگیوں کا دبا کم ہو رہا ہے تاہم بیرونی ادائیگیوں کے لیے بہتر فنانسنگ کی ضرورت ہے۔

رپورٹ میں کہا گیا کہ اسٹیٹ بینک نے شرح سود کو 22 فیصد پر برقرار رکھا ہے، مہنگائی میں اضافے کے خدشے کے باعث شرح سود کو برقرار رکھا گیا۔وزارت خزانہ نے کہا کہ حکومتی انتظامات کے باعث مہنگائی کو قابو کیا جا رہا ہے، رمضان ریلیف پیکیج کے تحت تاریخی سیل کی جا رہی ہے جبکہ پائیدار معاشی استحکام کے لیے بروقت پالیسی اقدامات درکار ہیں۔رپورٹ میں کہا گیا کہ ملک بھر میں مارچ میں مہنگائی 23.5 فیصد تک رہنے کی توقع ہے، اپریل میں مہنگائی کم ہو کر 21 سے 22 فیصد تک رہنے کا امکان ہے۔