پنجاب یو نیورسٹی کالج آف فارمیسی کے ڈاکٹر عمران طارق فلبرائٹ سکالر ایوارڈ کے لیے نامزد

لاہور (اُردو پوائنٹ اخبارتازہ ترین - اے پی پی۔ 09 اپریل2024ء) پنجاب یو نیورسٹی کالج آف فارمیسی شعبہ فارماسیوٹکس کے اسسٹنٹ پروفیسر ڈاکٹر عمران طارق کو تعلیم و تحقیق میں ان کی شاندار کامیابیوں کے اعتراف میں فل برائٹ سکالر ایوارڈ 2024 کیلئے نامزدکر دیاگیا۔فلبرائٹ سکالر ایوارڈ دنیا بھر کے تعلیمی پروگراموں میں سب سے زیادہ غیر معمولی ایوارڈز میں سے ایک ہے۔

959 ممکنہ امیدواروں میں سے پنجاب یونیورسٹی کالج آف فارمیسی کے ڈاکٹر عمران طارق کو نینو ٹیکنالوجی کے شعبے میں نمایاں خدمات اور دماغ کے کینسر کی جدید جین ڈیلیوری سے ممکنہ علاج کے پیش نظر اس ایوارڈ کے وصول کنندہ کے طور پر منتخب کیا گیا ہے۔اس کامیابی پر وائس چانسلر پنجاب یونیورسٹی پروفیسر ڈاکٹر خالد محمود نے ڈاکٹر عمران طارق کی تعریف کرتے ہوئے امید ظاہر کی کہ اس سے نینوتھیرانوسٹکس کے شعبے میں بین الاقوامی تعاون کو فروغ ملے گا۔

(جاری ہے)

انہوں نے کہا کہ ڈاکٹر عمران کی کامیابی قابل فخر ہے اور عالمی سطح پر ان کے کام کے مسلسل اثرات کی توقع ہے۔انہوں نے کہا کہ ڈاکٹر طارق کی فلبرائٹ سکالرشپ انہیں فارماسیوٹکس کے باہمی تعاون کے منصوبوں میں شامل ہونے کے قابل بنائے گی اور اپنے تعلیمی سفر کی مزید تکمیل اور بین الاقوامی روابط کو فروغ دے گی۔ڈاکٹر عمران طارق نے کہا کہ وہ یہ اعزاز حاصل کر کے بے حد فخر محسوس کر رہے ہیں۔

انہوں نے کہا کہ نینو تھیرانوسٹکس میں اپنی تحقیق کو آگے بڑھانے اور نینو ٹیکنالوجی کے ذریعے برین ٹیومر کے علاج کے لیے پاکستان میں نیورو لیب کے قیام میں اہم کردار ادا کرنے کے لیے پر عزم ہیں۔پرنسپل کالج آف فارمیسی پروفیسر ڈاکٹر سید عاطف رضا نے کہا کہ ڈاکٹر عمران طارق کی ریسرچ سے وابستگی اور نینو ٹیکنالوجی کے لیے جذبہ انہیں فلبرائٹ سکالرشپ ایوارڈ کا مستحق بناتا ہے۔انہوں نے کہا کہ شعبہ فارمیسی کی کمیونٹی ڈاکٹر عمران کو اس شاندار کامیابی پر مبارکباد پیش کرتی ہے۔