ملت ایکسپریس واقعہ،پولیس والا مریم کو ساتھ لے گیا تھا، خاتون کی بہن کی گفتگو

پیر 15 اپریل 2024 19:30

فیصل آباد(اُردو پوائنٹ اخبارتازہ ترین - این این آئی۔ 15 اپریل2024ء) ملت ایکسپریس سے خاتون کے مبینہ طور پر گر کر جاں بحق ہونے اور پولیس اہلکار کی جانب سے تشدد کے معاملے پر خاتون کی بڑی بہن شازیہ نے کہا ہے کہ پولیس والا مریم کو ساتھ لے گیا تھا۔نجی ٹی وی سے گفتگو میں خاتون کی بڑی بہن شازیہ نے بتایا کہ ٹرین میں رش کے دوران میری بہن مریم کا پرس کھو گیا تھا، فون پر بہن نے بتایا پولیس والا تنگ کر رہا ہے، میں نے فون پر ٹی ٹی سے بات کی اور ٹکٹ کے پیسے آن لائن بھجوانے کا کہا تھا۔

شازیہ کے مطابق میری بہن نے پولیس والے سے بھی فون پر بات کروانے کی کوشش کی، پولیس والے نے فون کال کے دوران ہی مریم پر تشدد شروع کردیا تھا، پولیس اہلکار دوران تشدد کہہ رہا تھا کینٹین والے ڈبے میں چلو۔

(جاری ہے)

خاتون کی بڑی بہن نے بتایا کہ تشدد کرنے والے اہلکار کے ساتھ دو دیگراہلکار بھی تھے، پولیس والا تشدد کرکے ساتھ لے گیا اور پھر مریم کی لاش کی اطلاع ملی۔

واضح رہے کہ چند روز قبل چلتی ٹرین میں خاتون اور بچے پر پولیس اہلکار کے تشدد کی ویڈیو سامنے آئی تھی جس کے بعد تشدد کرنے والے اہلکار کو گرفتار کر لیا گیا بعد ازاں خاتون پر تشدد کرنے والا ریلوے پولیس اہلکار ضمانت پر رہا ہوگیا تھا۔سامنے آنے والی ویڈیو میں خاتون کو یہ کہتے سنا جا سکتا ہے کہ مار کیوں رہا ہے، مار نہیں،مار نہیں۔