جماعت اسلامی نے پٹرولیم مصنوعات کی قیمتوں میں حالیہ اضافہ کومستردکردیا

پٹرول قیمتوں میں اضافہ عووام دشمن فیصلہ اورغریبوں سے روٹی کا آخری نوالہ چھیننے کے مترادف ہے،محمد حسین محنتی

منگل 16 اپریل 2024 17:32

کراچی (اُردو پوائنٹ اخبارتازہ ترین - این این آئی۔ 16 اپریل2024ء) جماعت اسلامی سندھ کے امیروسابق ایم این اے محمد حسین محنتی نے پٹرولیم مصنوعات کی قیمتوں میں حالیہ اضافہ کومستردکرتے ہوئے اسے عووام دشمن فیصلہ اورغریبوں سے روٹی کا آخری نوالہ چھیننے کے مترادف قراردیا ہے۔

(جاری ہے)

انہوں نے آج ایک بیان میں کہاکہ حکمرانوں کی نااہلی اورناکام معاشی پالیسیوں کی وجہ سے پہلے ہی مہنگائی کے طوفان سے معیشت زبوں حال اورمرغی،انڈے، گوشت ،آٹا، دالیں سمیت روزمرہ کی اشیائے صرف کی قیمتی آسمان سے باتیں کررہی ہیں پٹرول قیمتوں میں اضافہ سے مہنگائی میں مزیداضافہ ہوگا جس سے غریب آدمی اورتنخواہ دار طبقہ ہی سخت متاثر ہوگا۔

صوبائی امیرنے مزید کہاکہ عالمی منڈی میں تیل کی قیمتوں میں کمی کے باوجود یہاںمسلسل ایک ماہ کے دوران دوسری بار اضافہ عوام کے ساتھ سراسرظلم ہے۔صوبائی امیرنے پٹرول قیمتوں میں اضافہ کا فیصلہ واپس لینے کامطالبہ کرتے ہوئے کہاکہ حکمران طبقہ آئی ایم ایف کی فرمائش پرباربار بجلی گیس اورپٹرول قیمتوں میں اضافہ کی بجائے اپنی عیاشیان،غیرضروری اخراجات ،کرپشن اورمفت خوریاں ختم کرے۔