پی آئی آے کے شیئر ہولڈرز کی اکثریت نے پی آئی اے ہولڈنگ کمپنی کے حق میں فیصلہ سنا دیا

پی آئی اے انتظامیہ نے شیئر ہولڈرز کی آراء پر عمل کرتے ہوئے ادارے کی بہتری کیلئے اقدامات کیے، چیئرمین قومی ائیر لائن

ہفتہ 20 اپریل 2024 17:36

پی آئی آے کے شیئر ہولڈرز کی اکثریت نے پی آئی اے ہولڈنگ کمپنی کے حق ..

کراچی (اُردو پوائنٹ اخبارتازہ ترین - این این آئی۔ 20 اپریل2024ء) قومی ائیر لائن پی آئی اے کے شیئر ہولڈرز نے کثرت رائے سے پی آئی اے ہولڈنگ کمپنی کے حق میں ووٹ دیدیا۔پی آئی اے کے شیئر ہولڈرز کا غیر معمولی سالانہ اجلاس پی آئی اے ٹریننگ سینٹر کراچی میں ہوا جس میں پی آئی اے کارپوریشن لمیٹڈ کی پی آئی اے ہولڈنگ لمیٹڈ میں منتقلی کیلئے ووٹنگ ہوئی۔

پی آئی اے ترجمان کے مطابق اجلاس میں وفاقی سیکرٹری نجکاری کمیشن، سیکرٹری ایوی ایشن، مالیاتی مشیر کے قانونی ماہرین، سی ای او پی آئی اے ، تمام ڈائریکٹرز، شیئر ہولڈرز کا اعتماد حاصل کرنے کیلئے موجود تھے۔اجلاس میں شیئر ہولڈرز نے کثرت رائے سے پی آئی اے کارپوریشن لمیٹڈ کی پی آئی اے ہولڈنگ کمپنی میں منتقلی کے حق میں ووٹ دے دیا۔

(جاری ہے)

اس موقع پر چیئرمین اور سی ای او پی آئی اے نے شئیر ہولڈرز سے خطاب میں کہا کہ پی آئی اے انتظامیہ نے شیئر ہولڈرز کی آراء پر عمل کرتے ہوئے ادارے کی بہتری کیلئے اقدامات کیے اور گزشتہ برس کی پرفارمنس کے باعث ائیرلائن نے 13 سال بعد آپریٹنگ منافع کمایا ہے، پی آئی اے کے حصص کے کاروبار میں 700 گنا اضافہ دیکھنے میں آیا۔

چیئرمین پی آئی اے نے کہا کہ ایاسا آڈٹ کلیئر ہونے کے بعد پی آئی اے جون 2024 سے یورپ اور برطانیہ کا آپریشن شروع کرنے کا ارادہ رکھتا ہے۔حکام کے مطابق حکومت بہت سنجیدگی سے پی آئی اے کی بہتری کیلئے مشکل اقدامات لے رہی ہے اور اس اجلاس میں اعلیٰ حکومتی افسران کی موجودگی اس امر کی ضمانت ہے۔