ایک ایسا پاکستان تعمیر ہونا چاہیئے جہاں جمہوریت، مساوات اور انصاف کی حکمرانی ہو، بلاول بھٹو

کراچی ( اُردو پوائنٹ اخبارتازہ ترین۔ 18 اکتوبر2025ء ) پاکستان پیپلزپارٹی کے چیئرمین بلاول بھٹو زرداری کا کہنا ہے کہ ایک ایسا پاکستان تعمیر ہونا چاہیئے جہاں جمہوریت، مساوات اور انصاف کی حکمرانی ہو۔ تفسیلات کے مطابق چیئرمین پیپلزپارٹی بلاول بھٹو زرداری نے سانحہ کارساز کی برسی کے موقع پر شہداء کو خراجِ عقیدت پیش کیا اور کہا کہ ان کے حوصلے، وفاداری اور جمہوریت کے لیے دی گئی قربانیوں کو سلام ہے، سانحۂ کارساز آج بھی ہمارے ذہنوں میں زخم کی مانند تازہ ہے، 18 سال گزر چکے مگر 177 سے زائد جیالوں کی قربانیاں ہمیں ہر دن جمہوریت کے دفاع کی یاد دلاتی ہیں، یہ حملہ بطورِ منصوبہ آمریت اور دہشت گردی کی ملی بھگت تھا مگر قاتلوں کا مقصد ناکام ہوا اور ملک میں شہداء کے خون سے جمہوریت کا سورج پروان چڑھا۔

(جاری ہے)

ان کا کہنا ہے کہ آئیں آج عہد کریں کہ ہم شہدائے کارساز کی دی ہوئی قربانی کو رائیگاں نہیں جانے دیں گے اور امن و جمہوریت کے لیے ہر محاذ پر لڑتے رہیں گے، ہم شہید محترمہ بینظیر بھٹو اور کارساز کے شہدا کے مشن کو آگے بڑھائیں گے تاکہ ایک ایسا پاکستان تعمیر ہو جہاں جمہوریت، مساوات اور انصاف کی حکمرانی ہو۔ اسی طرح پاکستان پیپلز پارٹی شعبہ خواتین کی مرکزی صدر و رکن سندھ اسمبلی فریال تالپور نے سانحہ کارساز کی 18 ویں برسی کے موقع پر شہداء کو خراج عقیدت پیش کیا، اور اُن کے خاندانوں سے یکجہتی کا اظہار کرتے ہوئے کہا کہ آج کا دن ہمیں یاد دلاتا ہے کہ پاکستان میں جمہوریت کی جدوجہد شہیدوں کے خون اور ماؤں کے آنسوؤں سے سینچی گئی ہے، کارساز کے شہداء نے اپنی جانوں کا نذرانہ دے کر ثابتقدمی اور قربانی کی ایک نئی تاریخ رقم کی۔

میڈیا سیل بلاول ہاوَس سے جاری کردہ بیان میں ان کا کہنا ہے کہ شہید محترمہ بینظیر بھٹو کی وطن واپسی پر ان کے قافلے پر کیے گئے دہشتگردانہ حملے کے موقع پر اپنی قائد کے گرد ڈٹ کر کھڑے رہنے والے کارکنان نے ثابت کر دیا کہ گولیاں اور بارود جیالوں کے حوصلے کو شکست نہیں دے سکتے، صدر آصف علی زرداری اور چیئرمین بلاول بھٹو زرداری، شہید محترمہ بینظیر بھٹو کی جدوجہد اور مشن کو بڑی جراَت و تدبر کے ساتھ آگے بڑھا رہے ہیں۔

فریال تالپور نے کہا کہ ہم بطور ساتھی یہ عہد کرتے ہیں کہ کوئی ظلم اور کوئی سازش ہمیں چیئرمین بلاول بھٹو زرداری کی زیرِ قیادت عوام کے حقوق کی جدوجہد سے پیچھے نہیں ہٹا سکتی، آئیے آج یہ عہد کریں کہ ہم ایک پرامن، جمہوری اور منصفانہ پاکستان کے لیے اپنی جدوجہد جاری رکھیں گے، وہ پاکستان جس کا خواب قائدِ عوام شہید ذوالفقار علی بھٹو اور شہید محترمہ بینظیر بھٹو نے دیکھا اور جس کے لیے سانحہ کارساز کے شہداء نے اُس المناک رات اپنی جانوں کا نذرانہ پیش کیا۔