پاکستان، کینیڈا دوطرفہ سیاسی مشاورت کا پانچواں اجلاس ، کینیڈین کمپنیوں کو پاکستان میں توانائی، کان کنی اور آئی ٹی کے شعبوں میں سرمایہ کاری کرنے کی دعوت ، ترجمان دفترخراجہ

اسلام آباد (اُردو پوائنٹ اخبارتازہ ترین - اے پی پی۔ 27 اپریل2024ء) کینیڈین کمپنیوں کو پاکستان میں توانائی، کان کنی اور آئی ٹی کے شعبوں میں سرمایہ کاری کرنے کی دعوت ، پاکستان اور کینیڈا دوطرفہ سیاسی مشاورت کا 5واں 26 اپریل 2024 کو اوٹاوا میں منعقد ہوا۔ پاکستانی وفد کی قیادت ایڈیشنل سیکرٹری خارجہ (امریکاز)سفیر مریم آفتاب نے کی جبکہ کینیڈین وفد کی سربراہی اسسٹنٹ ڈپٹی منسٹر (انڈو پیسیفک) ویلڈن ایپ عالمی امور کینیڈا نے کی۔

ترجمان دفتر خارجہ کی جانب سے ہفتہ کو جاری اعلامیہ کے مطابق دونوں فریقوں نے دوطرفہ تعلقات کے تمام پہلوؤں کا جائزہ لیا اور مزید تعاون کے مواقع اور خاص طور پر تجارت، سرمایہ کاری، تعلیم، پارلیمانی تبادلوں، انسداد دہشت گردی اور عوام سے عوام کے رابطوں کے شعبوں میں امکانات کی نشاندہی کی،۔

(جاری ہے)

ایڈیشنل سیکرٹری خارجہ نے کینیڈین فریق کو پاکستان کی خارجہ پالیسی کی ترجیحات سے آگاہ کیا اور کینیڈین کمپنیوں کو پاکستان میں توانائی، کان کنی اور آئی ٹی کے شعبوں میں سرمایہ کاری کرنے کی دعوت دی۔

فریقین نے دوطرفہ تعلقات میں مجموعی پیشرفت پر اطمینان کا اظہار کیا اور باہمی دلچسپی کے تمام شعبوں میں تعاون بڑھانے کے عزم کا اظہار کیا۔ انہوں نے اقوام متحدہ سمیت بین الاقوامی فورمز پر تعاون پر بھی تبادلہ خیال کیا اور تعاون اور بات چیت کو مزید گہرا کرنے پر اتفاق کیا۔ اس موقع پر علاقائی اور عالمی صورتحال پر بھی تبادلہ خیال کیا گیا۔ کینیڈین فریق کو جنوبی ایشیائی خطے بالخصوص افغانستان، پاک بھارت تعلقات اور بھارت کے غیر قانونی طور پر مقبوضہ جموں و کشمیر میں انسانی حقوق کی خلاف ورزیوں کے حوالے سے حالیہ پیش رفت سے بھی آگاہ کیا گیا۔واضح رہے کہ دوطرفہ سیاسی مشاورت کا چھٹا دور باہمی مشاورت سے طے کردہ مناسب تاریخوں پر اسلام آباد میں ہوگا۔