مئی ملکی تاریخ کا سیاہ ترین دن ہے،جماعت اسلامی

سانحہ بارہ مئی،بلدیہ ٹائون کے مجرموں کو فارم47کے ذریعے ایک بار پھر قوم پر مسلط کردیا گیاہے،کاشف سعیدشیخ

اتوار 12 مئی 2024 18:30

کراچی(اُردو پوائنٹ اخبارتازہ ترین - این این آئی۔ 12 مئی2024ء) جماعت اسلامی سندھ کے قائمقام امیرکاشف سعید شیخ نے کہا ہے کہ 12مئی2007؁کادن ملکی تاریخ کا سیاہ ترین دن ہے جس دن سابق چیف جسٹس کی آمد پر شہر کے تمام راستے بند کرکے ریاستی سرپرستی میں بے گناہ لوگوں کے خون سے ہولی کھیلی گئی اور شام کو دارلحکومت میں اس وقت کے ڈکٹیٹر نے اپنا مکہ لہراکر فتح کا جشن منایاتھا، آج ایک بار پھر وہی اسٹیبلشمنٹ ،12مئی کے مجرم اور صوبائی ،وفاقی حکومت ایک پیج پر ہیں،سانحہ بارہ مئی کے کچھ مجرم تو دنیا میں ہی نشان عبرت بن چکے اور کچھ اپنی باری کے منتظر ہیں کیونکہ اللہ کی لاٹھی بے آواز ہے، ان کے ہاں دیر ضرورہے مگر اندھیر نہیں۔

انہوں نے ایک بیان میں کہا کہ 12کو بے گناہ لوگوں کو قتل،وکلاء کو اپنے چیمبرزاور سانحہ بلدیہ فیکٹری میں زندہ مزدوروں کو جلانے والے ایک ہی ہیں۔

(جاری ہے)

متحدہ قائدکوسائیڈ کرکے ایم کیو ایم میں شامل لوگ اپنے تمام جرائم سے بری الذمہ نہیں ہوسکتے، جس طرح 09مئی کے حوالے سے پی ٹی آئی کے پریس کانفرنس کرنے والوں کو کچھ نہیں کہا گیا ایسے ہی اسٹیبلشمنٹ کے اشاروں پر حکومتیں گرانے اور بنانے میں اپنا کردار ادا کرنے والے متحدہ کے لوگوں کے تمام جرائم کی پردہ پوشی کی جارہی ہے۔

12مئی کا سیاہ دن قوم ہرگز بھلا نہیں سکتی۔چیف جسٹس قاضی فائز عیسیٰ ،آرمی چیف سانحہ بلدیہ ٹائون اور 12مئی سمیت وکلا کو زندہ جلانے والوں کو کیفرکردار تک پہنچانے کیلئے اپنا کردار ادا کریں اور مظلوموں کو انصاف دیا جائے۔