غیررجسٹرد ڈنجی اسکولوں کیخلاف کارروائی ہو گی ،رفعیہ جاوید

کراچی (اُردو پوائنٹ اخبارتازہ ترین - آن لائن۔ 14 مئی2024ء) ڈائریکٹوریٹ پرائیوٹ انسٹی ٹیوشنز سندھ نے 2مئی سے 13مئی کے دوران ڈائریکٹوریٹ میں نجی اسکولوں کی جانب سے رجسٹریشن اور ان کی تجدید کے لئے جمع کروائی گئی درخواستوں پر کاروائی کرتے ہوئے ڈائریکٹوریٹ کی معائنہ کمیٹیوں نے 42 نجی اسکولوں کے دورے کے بعد اپنی رپورٹ جمع کروائی جس کے مطابق 2نئے اسکولوں کو جو محکمہ تعلیم کی جانب سے جاری کئے گئے معیار کو پورا کرتے تھے کو رجسٹریشن سرٹیفکیٹ جاری کر دئے گئے، جبکہ 12 اسکولوں کی رجسٹریشن کی انسپیکشن کمیٹی کی سفارشات کی روشنی میں تجدید کی گئی ہے اور 13 اسکولوں کو انکی دستاویزات اور دیگر کمیوں جس میں سائنس لیب ، لائبریری، کمپیوٹر لیب اور دیگر سہولیات نا ہونے کے باعث انہیں خطوط جاری کئے گئے ہیں کہ وہ ان کمیوں کو دور کریں تاکہ قانون کے مطابق ان اسکولوں کی رجسٹریشن اور ان کی تجدید کی درخواستوں پر عملدرآمد کیا جاسکے۔

(جاری ہے)

اس کے ساتھ ساتھ 15 نئے اسکولوں کی رجسٹریشن کی درخواستوں کو محکمہ تعلیم کی جانب سے مقرر کئے گئے معیار پر پورا نا اترنے کے باعث مسترد کرکے ان اسکولوں کے مالکان کو خطوط جاری کردئے گئے ہیں کہ وہ اپنے اسکولوں کو ایسی عمارتوں میں منتقل کریں جو محکمہ تعلیم کی جانب سے جاری کئے گئے معیارپر پورا اترتی ہوں۔ایڈیشنل ڈائریکٹر رجسٹریشن رفعیہ جاوید نے شہر بھر میں چلنے والے غیر رجسٹرڈ اسکولوں کی انتظامیہ کو تنبیہ جاری کی ہے کہ وہ رجسٹریشن کے لئے درخواستیں فی الفور ڈائریکٹوریٹ میں جمع کروائیں ورنہ ان کے خلاف قانونی کاروائی عمل میں لائے جائے گی، والدین سے بھی گزارش کیجاتی ہے کہ وہ غیر رجسٹرڈ اسکولوں میں اپنے بچوں کے داخلے نا کروائیں۔ #