عمران خان کی تصویر لیک کا معاملہ، سپریم کورٹ میں موبائل فون لے جانے پر پابندی عائد

اسلام آباد ( اُردو پوائنٹ اخبارتازہ ترین۔ 16 مئی 2024ء ) سپریم کورٹ آف پاکستان میں بانی پی ٹی آئی عمران خان کی تصویر لیک ہونے کے بعد موبائل فون لے جانے پر پابندی عائد کر دی گئی۔ اس حوالے سے مزید بتایا گیا ہے کہ عدالتی عملے نےکلرکس اور وکلا کو بھی موبائل فونز لے جانے سے روک دیا۔ صحافیوں کےموبائل فونز کمرہ عدالت میں لے جانے پر پہلے ہی پابندی عائد ہے۔

سپریم کورٹ میں عمران خان کی تصویر منظر عام پر آنے کی تحقیقات شروع کردی گئیں۔ نیب ترامیم کیس کی سماعت کے دوران ویدیو لنک پر موجود بانی پی ٹی آئی عمران خان کی تصویر سوشل میڈیا پر وائرل ہونے کی تحقیقات کا آغاز کردیا گیا ہے، اس حوالے سے سپریم کورٹ پولیس نے تحقیقات شروع کردی ہیں۔ عمران خان کی تصویر کمرہ عدالت کے بائیں جانب بیٹھے افراد میں سے کسی نے بنائی، جس کے باعث کمرہ عدالت کی بائیں جانب موجود افراد سے پوچھ گچھ شروع کر دی گئی، اس کے علاوہ کمرہ عدالت میں جانے والے افراد کی تلاشی میں بھی اضافہ کر دیا گیا۔

(جاری ہے)

بتاتے چلیں کہ پاکستان تحریک انصاف کے قائد عمران خان نیب ترامیم کیس میں ویڈیو لنک پر سپریم کورٹ میں پیش ہوئے، اس سلسلے میں وفاقی حکومت نے سپریم کورٹ کے حکم پر بانی پی ٹی آئی کی ویڈیو لنک پر پیشی کے انتظامات مکمل کیے، جیل انتظامیہ نے بانی پی ٹی آئی کو ویڈیو لنک پیشی سے آگاہ کیا، متوقع ویڈیو لنک پیشی سے قبل کیمیونی کیشن ٹیسٹ بھی مکمل کیا گیا جب کہ سپریم کورٹ میں پیشی کے موقع پر سابق وزیراعظم نے سکائی بلیو رنگ کی شرٹ پہن رکھی تھی اور ان کے ہاتھ میں پانی کی بوتل بھی موجود تھی، سپریم کورٹ میں نیب ترامیم کیس کے موقع پر سابق وزیراعظم عمران خان کی ویڈیو لنک پر پیشی کی تصویر سامنے آنے کے بعد تیزی سے سوشل میدیا پر وائرل ہوگئی۔