شہید محترمہ بینظیر بھٹو کی مفاہمت کی پالیسی ملک کے استحکام و ترقی کا روڈ میپ ہے، محمد علی ملکانی

کراچی (اُردو پوائنٹ اخبارتازہ ترین - اے پی پی۔ 17 مئی2024ء) وزیر برائے یونیورسٹیز اینڈ بورڈز محمد علی ملکانی نے کہا ہے کہ شہید محترمہ بینظیر بھٹو کی مفاہمت کی پالیسی اس ملک کے استحکام و ترقی کا روڈ میپ ہے۔ جمعہ کو جاری اعلامیہ کے مطابق شہید محترمہ بینظیر بھٹو چیئر جامعہ کراچی کے زیر اہتمام کانفرنس بعنوان''مفاہمت، شہید محترمہ بینظیر بھٹو کا وژن'' سے تقریب کا انعقاد کیا گیا جس میں پبپلزپارٹی سندھ کے صدر سینیٹر نثار احمد کھوڑو، وزیر یونیورسٹیز اینڈ بورڈز محمد علی ملکانی، جسٹس (ر) حسن فیروز اور بڑی تعداد میں طلبا نے شرکت کی۔

اس موقع پر کانفرنس سے خطاب کرتے ہوئے محمد علی ملکانی نے کہا کہ شہید محترمہ بینظیر بھٹو اپنے نام کی طرح بینظیر تھیں اور رہیں گی،شہید بینظیر بھٹو کی مفاہمتی پالیسی ہی آج کے تمام ملکی مسائل کا حل ہے۔

(جاری ہے)

محمد علی ملکانی نے کہا کہ چیئرمین پیپلز پارٹی بلاول بھٹو زرداری شہید محترمہ بینظیر بھٹو کی مفاہمت پالیسی کے نقش قدم پر چل رہے ہیں اور صدر مملکت آصف زرداری نے جمہوریت بہترین انتقام ہے کا عملی ثبوت پیش کیا۔

پیپلزپارٹی کی قیادت نے اپنی جانوں کا نذرانہ پیش کرکے اس ملک میں جمہوریت کو بحال کروایا ۔وزیر جامعات نے شہید بینطیر بھٹو چیئر کو محترمہ کی زندگی و جمہوری جدوجہد پر مزید ریسرچ کرنے کی تلقین کی اور اپنے تعاون کی یقین دہانی کروائی۔کانفرنس کے اختتام پر میڈیا سے بات کرتے ہوئے محمد علی ملکانی نے کہا کہ امتحانات کے دوران نقل میں ملوث ذمہ داران کے خلاف ایکشن لیا گیا ہے اور ملوث عملے کو معطل بھی کیا ہے۔

انہوں نے کہا کہ رات کو اچانک سے امتحانی مراکز تبدیل کیے گئے جن پر والدین نے شکایت کی تھی تو ہم نے فوری طور پر ایکشن لیا اور امتحانی مراکز تبدیلی کے احکامات واپس کروائے ۔ایک سوال کے جواب میں انہوں نے کہا کہ تعلیم کی بہتری کے لیے جب تک والدین ہمارے ساتھ تعاون نہیں کریں گے ہم کچھ نہیں کرسکیں گے۔محمد علی ملکانی نے کہا کہ آج مجھے اس محکمہ کا قلمدان سنبھالتے ہوئے صرف ایک ماہ ہوا ہے اور اس میں بھی ہم نے بھرپور کوشش کی ہے،امید ہے کہ آئندہ برس تک اس میں واضح بہتری نظر آئے گی،ہم امتحانات کے بعد تمام درپیش مسائل کے حل کے لیے اسٹیک ہولڈرز کے ساتھ ملکر جامع حکمت عملی مرتب کریں جس سے بورڈ کے امتحانات میں کافی مثبت تبدیلی آئے گی۔

میڈیا کی طرف سے کئے گئے سوال کے جواب میں محمد علی ملکانی نے کہا کہ 550کے قریب امتحانی مراکز کو سنبھالنا ایک بہت بڑی ذمہ داری ہے،ہم سب نے ملکر کام کرنا ہے۔انہوں نے کہا کہ امتحانات میں گڑبڑ کرنے والوں کے خلاف پہلے بھی کاروائی کی ہے مزید کاروائی بھی کرینگے۔