ضلعی زکوٰة آفس کے زیر اہتمام زکوٰة کی آگاہی کے حوالے سے سیمینار اور واک کا اہتمام

بدھ 22 مئی 2024 16:50

قصور (اُردو پوائنٹ اخبارتازہ ترین - این این آئی۔ 22 مئی2024ء) محکمہ زکوٰة و عشر پنجاب کی خصوصی ہدایات کی روشنی میں ضلعی زکوٰة آفس قصور کے زیر اہتمام زکوٰة کی آگاہی کے حوالے سے سیمینار اور واک کا اہتمام کیا گیا ۔جس میں ڈسٹرکٹ زکوٰة آفیسر قصور اشفاق احمد خاں ،انجمن تاجران ، سول سوسائٹی اور محکمہ ہذا کے ملازمین نے بھرپور شرکت کی ۔ اس موقع پر ڈسٹرکٹ زکوٰة آفیسر اشفاق احمد خاں نے گفتگو کرتے ہوئے کہا کہ زکوٰة ایک مذہبی فریضہ ہے جو صاحب حیثیت افراد سے لیکر غرباء و مساکین میں تقسیم کی جاتی ہے۔

محکمہ زکوٰة و عشر پنجاب کے زیر اہتمام بیوگان، معذور افراد اور غرباء کو گزارہ الاؤنس کی صورت میں زکوٰة کی ادائیگی بذریعہ ایزی پیسہ کی جاتی ہے۔ اس کے علاوہ فنی تربیت کے ادارہ جات‘کالجز، یونیورسٹی اور دینی مدارس میں زیر تعلیم غریب بچوں کو زکوٰة فنڈ سے وظائف کی ادائیگی کی جاتی ہے۔

(جاری ہے)

ہسپتالوں کے ذریعے زکوٰة کے حقدار مریضوں کو بھی علاج معالجہ کیلئے مفت ادویات کی صورت میں امداد دی جاتی ہے۔ انہوں نے مزید کہا کہ زکوٰة کی تقسیم کا طریقہ کار انتہائی صاف اور شفاف ہے۔ بعدازاں ڈسٹرکٹ زکوٰة آفیسر کی قیادت میں انکے آفس سے چوک گورانوالا بھٹہ تک آگاہی واک بھی کی گئی اور شہریوں میں آگاہی مفلٹس بھی تقسیم کئے گئے۔