ڈپٹی کمشنر گجرات کا عزیز بھٹی شہید ہسپتال کا دورہ ، جاری ری ویمپنگ و ترقیاتی کاموں کا تفصیلی جائزہ

گجرات (اُردو پوائنٹ اخبارتازہ ترین - اے پی پی۔ 22 مئی2024ء) ڈپٹی کمشنر گجرات صفدر حسین ورک نے عزیز بھٹی شہید ہسپتال کا دورہ کیا اور جاری ری ویمپنگ و ترقیاتی کاموں کا تفصیلی جائزہ لیا۔ ایم ایس عزیز بھٹی شہید ہسپتال ڈاکٹر ایاز ناصر چوہان، ایکسیئن بلڈنگز باسط علی نے جاری ترقیاتی کاموں پر بریفنگ دی ۔ اس موقع پر ڈپٹی ڈائریکٹر ڈویلپمنٹ جہانگیر بٹ بھی موجود تھے۔

ڈپٹی کمشنر صفدر حسین ورک نے حفاظتی اقدامات کا جائزہ لیا اور بتایا کہ عزیز بھٹی شہید ہسپتال کی ری ویمپنگ پر 770ملین سے زائد کی لاگت آئے گی، ترقیاتی پراجیکٹ کے تحت بلڈنگ کی مرمت و تزئین و آرائش ضروری کام مکمل کروائے جارہے ہیں۔ انہوں نے بتایا کہ ہسپتال کے وارڈز، چھتوں سمیت دروازوں اور کھڑکیوں کو بھی درست اور تبدیل کیا جا رہا ہے۔

(جاری ہے)

عمارت کی تزئین و آرائش اور جدید سہولیات کا اضافہ کیا جارہا ہے۔ڈپٹی کمشنر صفدر حسین ورک نے کہا کہ عزیز بھٹی شہیدہسپتال میں روزانہ سینکڑوں مریض ہسپتال کا رخ کرتے ہیں اور صحت عامہ کی سہولیات سے مستفید ہو رہے ہیں۔ہسپتال میں مریضوں کو بہترین سہولیات کی فراہمی کو یقینی بنانے کے لیے اقدامات کیے جارہے ہیں۔ ڈپٹی کمشنر صفدر حسین ورک نے کہا کہ ری ویمپنگ کا کام جلد از جلد مکمل کیا جائے، منصوبے کو ہر صورت مقررہ وقت میں مکمل کیا جائے،معیار پر کوئی سمجھوتہ نہ کیا جائے، منظور شدہ سکوپ کے مطابق تمام کام کیا جائے، کوالٹی میٹریل کا استعمال یقینی بنایا جائے۔