عدالتی احکامات پر عمل درآمد نہ کرنے کیخلاف انٹراکورٹ اپیل نمٹا دی گئی

بدھ 22 مئی 2024 23:19

لاہور (اُردو پوائنٹ اخبارتازہ ترین - آن لائن۔ 22 مئی2024ء) لاہور ہائیکورٹ کے جسٹس علی باقر نجفی کی سربراہی میں دورکنی بینچ نے ایم ڈی پنجاب گورنمنٹ سرونٹس ہائوسنگ فاونڈیشن رائے ناصر کے بیان کی روشنی میں عدالتی احکامات پر عمل درآمد نہ کرنے کیخلاف انٹراکورٹ اپیل نمٹا دی۔ رائے ناصر نے عدالتی فیصلے پر من وعن عمل درآمد کرنے کی یقین دہانی کراتے ہوئے کہا کہ عدالتی فیصلے کی روشنی میں رولز میں ترمیم کی جارہی ہے، رولز میں ترمیم کیلئے آئندہ دویوم میں بورڈ کا اجلاس بھی بلالیاگیا ہے۔

عائشہ بی بی کے وکیل اسد منظور بٹ نے موقف اپنایا کہ پیسوں کی ادائیگی اور عدالتی فیصلے کی باوجود پلاٹ کاقبضہ نہیں دیا جا رہا، عدالتی حکم پر سیکرٹری پنجاب ایمپلائز ہاوسنگ فاونڈیشن نے پلاٹ کاقبضہ دینے کی یقین دہانی کرائی، متعلقہ سیکرٹری نے اپنے بیان کیب اوجود قبضہ نہیں دیا، عدالتی فیصلے پر عمل کرنے کی بجائے محکمہ نے سپریم کورٹ اپیل دائرکر دی۔

(جاری ہے)

سپریم کورٹ میں اپیل زیرالتواء ہونے کے باوجود محکمہ نے لاہور ہائیکورٹ میں انٹراکورٹ اپیل بھی دائرکر دی، معاملہ سپریم کورٹ ہونے کے باوجود انٹراکورٹ اپیل محکمہ کی جانب سے عدالت کو گمراہ کرنے کی کوشش ہے، عدالت غلط بیانی کرنے والے ذمہ دار افسروں کیخلاف توہین عدالت کی کارروائی کرے۔