وزیراعظم شہباز شریف کی زیر صدارت خصوصی سرمایہ کاری سہولت کونسل کا دسواں اجلاس آج ہوگا

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔25مئی۔2024 ) وزیراعظم شہباز شریف کی زیر صدارت خصوصی سرمایہ کاری سہولت کونسل (ایس آئی ایف سی) کا دسواں اجلاس آج ہوگا خصوصی سرمایہ کاری سہولت کونسل کا اجلاس سہہ پہر وزیراعظم ہاﺅس میں ہوگا اور اس حوالے سے اجلاس کا ایجنڈا جاری کردیا گیا ہے ایس آئی ایف سی اجلاس میں وزیراعلی پنجاب مریم نواز، وزیراعلی سندھ سید مراد علی شاہ اور وزیراعلی بلوچستان سرفراز بگٹی کو مدعو کیا گیا ہے، جبکہ تحریک انصاف کی جانب سے تنقید اور احتجاج کے بعد وزیراعلی خیبرپختونخوا علی امین گنڈا پور کو بھی ایس آئی ایف سی اجلاس میں مدعو کرلیا گیاہے.

(جاری ہے)

اجلاس میں وفاقی وزیراطلاعات عطاءتارڑ، وزیرخزانہ محمد اورنگزیب، وزیردفاع خواجہ آصف، وزیرمنصوبہ بندی وترقی احسن اقبال، وزارت تجارت جام کمال خان، وزیر قانون وانصاف اعظم نذیر تارڑ اور وزیر آبی وسائل کو بھی مدعو کیا گیا ہے. ڈپٹی وزیراعظم اسحاق ڈار بھی ایس آئی ایف سی اجلاس میں شرکت کریں گے اجلاس میں چاروں صوبوں کے چیف سیکرٹری بھی شریک ہونگے، اجلاس میں غیر ملکی سرمایہ کے حوالے سے تبادلہ خیال کیا جائے گا.

خصوصی سرمایہ کاری سہولت کونسل کے گزشتہ اجلاس میں وزیراعظم شہباز شریف نے کہا تھا کہ ایس آئی ایف سی ایک اہم پلیٹ فارم ہے جسے جاری رکھا جائے گا، معاشی چیلینجز سے نمٹنے کے لیے سب کا مل بیٹھنا خوش آئند اور وقت کی ضرورت ہے.