جموں وکشمیر کی ریاستی حیثیت کی بحالی تک اسمبلی انتخابات میں حصہ نہیں لوں گا، عمر عبداللہ

سرینگر (اُردو پوائنٹ اخبارتازہ ترین - اے پی پی۔ 11 جون2024ء) غیر قانونی طور پربھارت کے زیر قبضہ جموں و کشمیرمیں نیشنل کانفرنس کے رہنما عمر عبد اللہ نے کہاہے کہ وہ آئندہ اسمبلی انتخابات میں حصہ لے کراپنی تذلیل نہیں کرائیں گے بلکہ اس کے بجائے جموں وکشمیر کی ریاستی حیثیت کی بحالی کے لئے اپنی پارٹی مہم کی قیادت کریں گے۔کشمیرمیڈیاسروس کے مطابق عمر عبداللہ نے بی جے پی حکومت کی دو اہم اتحادی جماعتوں تلگودیشم پارٹی اور جنتا دل یونائیٹڈکو خبردارکیا کہ بھارتیہ جنتا پارٹی اپنے دو اہم اتحادیوں پر انحصار کو ختم کرانے کے لئے ان کے ارکان کو اپنے ساتھ ملانے کی کوشش کرے گی۔

عمرعبد اللہ کا بیان اس وقت سامنے آیا جب بی جے پی پارلیمانی انتخابات میں اکثریت حاصل کرنے میں ناکام رہی تاہم وہ اپنے اتحادیوں کے ساتھ ملکر حکومت بنانے میں کامیاب ہوگئی۔

(جاری ہے)

نیشنل کانفرنس کے رہنما کو یقین ہے کہ بی جے پی اپنی حکومت کو مستحکم کرنے کے لئے دوسری جماعتوں کے ارکان پارلیمنٹ کو غیر قانونی طور پر اپنے ساتھ ملانے کی کوشش کرے گی۔

انہوں نے ٹی ڈی پی اور جے ڈی یوکو ہوشیار رہنے کا مشورہ دیاکیونکہ بی جے پی کا ''آپریشن کنول''ماضی میں کامیاب رہا ہے۔آپریشن کنول بھارت میں ایک ایسی سیاسی اصطلاح ہے جس کے تحت بھارتیہ جنتا پارٹی دوسری جماعتوں خاص طور پر اپنی اتحادیوں جماعتوں کے ارکان کو بی جے پی میں شامل ہونے یا اس کی حکومت کی حمایت کرنے پر مجبور کرتی ہے تاکہ وہ اپنی اکثریت برقرارررکھ سکے یااپنی پوزیشن کو مزید مضبوط کرسکے۔ یہ اصطلاح بی جے پی کے انتخابی نشان ''کنول''سے اخذ کی گئی ہے۔