اسلام آباد کی ڈسٹرکٹ اینڈ سیشن عدالت نے عمران خان اور بشری بی بی مقدمات میں درخواست ضمانت پر سماعت ملتوی کردی

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔11 جون۔2024 ) اسلام آباد کی ڈسٹرکٹ اینڈ سیشن عدالت نے سابق وزیر اعظم عمران خان کی 6 اور ان کی اہلیہ بشری بی بی کی ایک مقدمے میں درخواست ضمانت کے کیس پر سماعت 26 جون تک ملتوی کردی ہے عمران خان کے خلاف توڑ پھوڑ، احتجاج پر درج 6 مقدمات میں درخواست ضمانت قبل از گرفتاری پر ایڈیشنل سیشن جج افضل مجوکا نے سماعت کی.

تحریک انصاف کے بانی چیئرمین عمران خان کے وکلا عثمان گل اور خالد یوسف چوہدری عدالت کے روبرو پیش ہوئے، وکلا نے بتایا کہ سینئر وکیل سلمان صفدر اسلام آباد ہائی کورٹ میں ہیں.

(جاری ہے)

انہوں نے عدالت سے استدعا کی کہ عدالت سلمان صفدر کے آنے تک سماعت میں وقفہ کر دے، وکیل عثمان ریاض گل نے بتایا کہ شاہزیب کیس کے مطابق اسلام آباد ہائی کورٹ نے فیصلہ دیا تھا کہ حاضری کے بغیر ضمانت قبل از گرفتاری کنفرم نہیں ہو سکتی اس پر جج افضل مجوکا نے ریمارکس دیے کہ میں نے جو فیصلہ پڑھا اس کے مطابق عدالت حاضری معاف کر کے ضمانت سن سکتی ہے اور میں نے ایسا کیا بھی ہے تاہم وکیل نے بتایا کہ سپریم کورٹ اپنی ججمنٹ میں یہ واضح کر چکی ہے کہ ہر پیشی پر ملزم کی حاظری لازمی ہے، عدالت نے یہ بھی دیکھنا ہے کہ 17 گریڈ کا افسر 6 ماہ سے عدالت کے آرڈر روند رہا ہے.

اس پر وکیل خالد یوسف چوہدری نے کہا کہ عدالت عمران خان کی وڈیو لنک کے ذریعے حاضری کے احکامات جاری کرے بعد ازاں عدالت نے کیس کی سماعت میں وقفہ کر دیا وقفے کے بعد سماعت کے دوبارہ آغاز پر عدت نکاح کیس میںتحریک انصاف کے وکیل سردار مصروف کی جانب سے عمران خان کی 6 اور بشری بی بی کی ایک مقدمے میں ضمانت قبل از گرفتاری کی سماعت ملتوی کرنے کی استدعا کی گئی سردار مصروف نے بتایا کہ درخواست ضمانتوں پر دلائل سینئر وکیل سلمان صفدر نے دینے ہیں، تاہم سلمان صفدر آج اسلام آباد ہائی کورٹ سے اڈیالہ جیل جائیں گے، اڈیالہ جیل میں 190 ملین پاﺅنڈز کیس کی سماعت مقرر ہے، لہذا عدالت اس کیس میں عید کے بعد کی تاریخ رکھ دے.

جج افضل مجوکا نے بتایا کہ اس کیس میں عمران خان کی حاضری کا آرڈر کروں گا، آرڈر میں لکھوں گا کہ ہر صورت عمران خان کی ویڈیو لنک کے ذریعے حاظری یقینی بنائی جائے بعد ازاں عدالت نے کیس کی سماعت 26 جون تک کے لیے ملتوی کر دی ہے .