ایل ڈی اے افسران پر فائرنگ کے الزام میں ملزمان کی عبوری ضمانتوں میں25جون تک توسیع

ہفتہ 15 جون 2024 14:41

لاہور (اُردو پوائنٹ اخبارتازہ ترین - اے پی پی۔ 15 جون2024ء) لاہور کی انسداد دہشت گردی کی خصوصی عدالت نے سرکاری پلاٹوں پر قبضہ اور ایل ڈی اے افسران پر فائرنگ کے الزام میں درج دو مقدمات میں لاہور کی سیاسی شخصیت منشا بم کے دو بیٹوں کی عبوری ضمانتوں میں 25جون تک توسیع کردی۔ عدالت نے تفتیشی افسر کو ملزمان کو شامل تفتیش کرنے کا حکم دے دیا ۔انسداد دہشت گردی عدالت کے ایڈمن جج خالد ارشد نے سماعت کی۔

(جاری ہے)

ہفتہ کو سماعت پر عامر منشا اور طارق منشا حاضری کیلئے عدالت پیش ہوئے اور اپنی حاضری لگائی۔ ملزمان کی جانب سے شیر گل قریشی ایڈووکیٹ پیش ہوئے۔پراسیکیوشن نے کہا کہ ملزمان شامل تفتیش نہیں ہو رہے ۔عامر منشا اور طارق منشا کافی عرصہ اس مقدمہ میں اشتہاری بھی رہے۔ منشا بم اور اس کے بیٹوں کیخلاف تھانہ ٹائون شپ میں مقدمہ درج ہے۔منشا بم اور دیگر پر ایل ڈی اے افسران پر تشدد اور فائرنگ کا الزام ہے۔عدالت نے ملزمان کو شامل تفتیش ہونے کی ہدایت کرتے ہوئے منشا بم کے دو بیٹوں کے دو مقدمات کی عبوری ضمانتوں میں 25جون تک توسیع کا حکم دیدیا۔