اسمگل شدہ گاڑیوں کی ریگولرائزیشن میں ملوث 13 افسران گرفتار

28 اگست 2025ء کو ایف آئی اے نے ان افسران کے خلاف ایف آئی آر درج کی، ایف آئی اے نے باقاعدہ گرفتار کر لیا

جمعرات 4 ستمبر 2025 13:58

اسمگل شدہ گاڑیوں کی ریگولرائزیشن میں ملوث 13 افسران گرفتار

اسلام آباد(اُردو پوائنٹ اخبارتازہ ترین - این این آئی۔ 04 ستمبر2025ء)اسمگل شدہ گاڑیوں کی ریگولرائزیشن میں ملوث افسران کے خلاف کارروائی کی گئی ہے۔اس حوالے سے ایف بی آر کا کہنا ہے کہ اسکینڈل میں ملوث 13 ملزمان گرفتار کر لیے گئے جبکہ اس سلسلے میں 7ایف آئی آرز درج کی گئی ہیں۔ایف بی آر نے بتایا ہے کہ 28 اگست 2025ء کو ایف آئی اے نے ان افسران کے خلاف ایف آئی آر درج کی، اسکینڈل میں ملوث پائے گئے افراد کو ایف آئی اے نے باقاعدہ گرفتار کر لیا۔

اگست 2021ء میں گاڑیوں کا غلط استعمال روکنے کے لیے ’آکشن ماڈیول‘ متعارف کرایا گیا تھا، جولائی 2025ء میں آکشن ماڈیول کے غلط استعمال کی رپورٹس سامنے آئیں، ماڈیول کے آغاز سے اب تک 1 ہزار 909 گاڑیوں کی تفصیلات سسٹم میں اپ لوڈ کی گئی تھیں، جانچ پڑتال کے بعد معلوم ہوا کہ 103 گاڑیاں جعلی یوزر آئی ڈیز کے ذریعے اپ لوڈ کی گئی ہیں۔

(جاری ہے)

43 اسمگل شدہ گاڑیوں کو پہلے ہی رجسٹر ہو کر قانونی حیثیت حاصل ہو چکی تھی، ا نکوائری پر 9 جولائی 2025ء کو ایک ڈپٹی کلکٹر اور ایک اسسٹنٹ کلکٹر کو معطل کیا گیا، بڑے مجرمانہ نیٹ ورک میں موٹر رجسٹریشن اتھاریٹز کے افسران اور کار ڈیلرز شامل تھے۔

ایف بی آر نے بتایا ہے کہ 9 جولائی 2025ء کو جے آئی ٹی بنانے کی باضابطہ درخواست کی گئی، یہ جے آئی ٹی ایف آئی اے، کسٹمز اور انٹیلی جنس ایجنسیوں کے سینئر افسران پر مشتمل تھی، جے آئی ٹی کو کسٹمز کے ڈیجیٹل سسٹم میں کی گئی ہیرا پھیری کی تحقیقات کی ذمے داری دی گئی تھی۔