سرکاری زمین پر قبضے کے مقدمات، منشا بم کے بیٹوں کی عبوری ضمانت میں توسیع

منگل 25 جون 2024 12:31

لاہور (اُردو پوائنٹ اخبارتازہ ترین - اے پی پی۔ 25 جون2024ء) لاہور کی انسدادِ دہشت گردی کی خصوصی عدالت نے ایل ڈی اے کی سرکاری زمین پر قبضے کے الزام میں درج دو مقدمات میں لاہور کی سیاسی شخصیت منشا بم کے دو بیٹوں کی عبوری ضمانتوں میں 29 جون تک توسیع کرتے ہوئے تفتیشی افسر کو آئندہ سماعت پر مقدمات کے مکمل چالان پیش کرنے کی ہدایت کردی ۔انسداد دہشت گردی عدالت کے ایڈمن جج خالد ارشد نے منگل کو کیس کی سماعت کی۔

(جاری ہے)

سماعت پر عبوری ضمانتوں کی میعاد ختم ہو نے پر ملزمان عامر منشا اور طارق منشا حاضری کیلئے عدالت میں پیش ہوئے اور اپنی حاضری لگائی۔ دوران سماعت سرکاری پراسیکیوٹر نے عدالت کو بتایا کہ ملزمان شامل تفتیش نہیں ہو رہے ہیں ۔ملزمان کے وکیل نے عدالت کو آگاہ کیا کہ ہم روز جاتے ہیں لیکن تفتیشی افسر شامل تفتیش نہیں کر رہا۔ عدالت نے تفتیشی افسر کو ملزمان کو شامل تفتیش کرکے آئندہ سماعت پر مکمل تفتیشی رپورٹ پیش کرنے کا حکم دے دیا۔ عدالت نے تفتیشی افسر کو مقدمے کا چالان بھی پیش کرنے کا حکم دیا ہے ۔منشا بم کے بیٹوں کیخلاف تھانہ ٹائون شپ میں مقدمہ درج ہے اور ان پر ایل ڈی اے افسران پر تشدد اور فائرنگ کا الزام ہے۔