سابق چیف جسٹس ثاقب نثار کے چیمبر کا حصہ رہا ہوں،چیف جسٹس عامر فاروق

نوجوان وکلاء کی رہنمائی کے لیے بار کونسلز کو کردار ادا کرنا ہو گا، چیف جسٹس اسلام آباد ہائی کورٹ

جمعرات 11 جولائی 2024 16:44

سابق چیف جسٹس ثاقب نثار کے چیمبر کا حصہ رہا ہوں،چیف جسٹس عامر فاروق

اسلام آباد (اُردو پوائنٹ اخبارتازہ ترین - این این آئی۔ 11 جولائی2024ء) چیف جسٹس اسلام آباد ہائی کورٹ عامر فاروق نے بتایا ہے کہ میں سابق چیف جسٹس میاں ثاقب نثار کے چیمبر کا حصہ رہا ہوں، میاں ثاقب نثار اور اٴْن کے والد میاں نثار دونوں وہ چیمبر چلاتے تھے۔چیف جسٹس اسلام آباد ہائی کورٹ عامر فاروق نے اسلام آباد ہائی کورٹ بار ایسوسی ایشن کی تقریب سے خطاب کرتے ہوئے کہا کہ نوجوان وکلاء کی رہنمائی کے لیے بار کونسلز کو کردار ادا کرنا ہو گا۔

انہوںنے کہا کہ کسی وکیل سے سرزنش کا مقصد کسی کی دل آزاری نہیں بلکہ سکھانا ہوتا ہے، یہ پروفیشنل اور اصولوں کا معاملہ ہوتا ہے۔چیف جسٹس اسلام آباد ہائی کورٹ عامر فاروق نے کہا کہ ہم فیصلہ لکھتے ہوئے نہیں سوچتے کہ روسٹرم پر کن جملوں کا تبادلہ ہوا۔

(جاری ہے)

انہوں نے زور دیا کہ نوجوان وکلاء کو کیس کی تیاری کے علاوہ اچھے آداب کے ساتھ عدالت میں پیش ہونا چاہیے، ہمارے وقت میں اگر کسی نے کیس کی فائل نہیں پڑھی ہوتی تھی تو عدالت سے ڈانٹ پڑتی تھی۔

چیف جسٹس اسلام آباد ہائی کورٹ عامر فاروق کا کہنا ہے کہ ینگ وکلاء سے درخواست ہے کہ مقدمات کی فائلیں پڑھ کر آئیں، اچھی بار ہی اچھا بینچ بناتی ہے۔انہوں نے کہا کہ ہم سب نے اپنا کردار ادا کر کے چلے جانا ہے، نوجوانوں نے اِن سیٹوں پر بیٹھنا ہے، وکلاء ٹائی اور بال اِدھر اٴْدھر ہوتے ہوئے عدالت میں پیش ہو جاتے ہیں، شروع کے دنوں میں اس بات پر غصہ کیا، اب چھوڑ دیا۔چیف جسٹس اسلام آباد ہائی کورٹ عامر فاروق نے کہا کہ ہم نے خیال کرنا ہے کیونکہ لوگ انصاف کے لیے ہماری طرف دیکھتے ہیں۔انہوںنے کہاکہ غصے میں دیا گیا فیصلہ صحیح نہیں ہوتا، میرا اسٹاف گواہی دے گا کہ میں نے اپنے کیریئر میں کبھی غصے میں فیصلہ نہیں دیا۔