اسلام آباد الیکشن ٹریبونل نے این اے 46,47,48, میںمبینہ دھاندلی کیس کی سماعت روک دی

پیر 15 جولائی 2024 22:50

اسلام آباد (اُردو پوائنٹ اخبارتازہ ترین - آن لائن۔ 15 جولائی2024ء) اسلام آباد الیکشن ٹریبیونل نے قومی اسمبلی کے حلقوں این اے 46,47,48, میں اسلام آباد ہائیکورٹ کے حکم پرکارروائی روک دی ہے اور کیس کی سماعت 24 جولائی تک کیلئے ملتوی کردی۔ پیرکودوران سماعت الیکشن ٹریبونل جسٹس طارق محمود جہانگیری نے قومی اسمبلی کے حلقوں این اے 46، این اے 47 اور این اے 48 میں دھاندلی سے متعلق کیس کے دوران ریمارکس دیے کہ ہائی کورٹ نے ٹرائل آگے بڑھانے پر اسٹے دیا ہے، میں تو روزانہ کی بنیا د پر ٹرائل کے لیے تیار ہوں، آپ جاکر اسٹے ختم کرائے۔

انہوں نے یہ ریمارکس گزشتہ روز دیئے ہیں۔اسلام آباد ہائیکورٹ کے الیکشن ٹریبونل میں وفاقی دارالحکومت کے حلقوں میں الیکشن دھاندلی سے متعلق کیسز کی سماعت ہوئی، کیس کی سماعت جسٹس طارق محمود جہانگیری نے کی۔

(جاری ہے)

عدالت نے استفسار کیا کہ آپ کے پاس تو تمام فارمز آگئے ہیں اب کیا چاہیئے، پی ٹی آئی امیدوار کے وکیل سے شعیب شاہین نے کہا کہ میں اپنے کیس کی بات کروں گا مجھے فارمز نہیں ملیں۔

جسٹس طارق محمود جہانگیری نے کہا کہ ہائی کورٹ نے ٹرائل آگے بڑھانے پر اسٹے دیا ہے، ہم نے تینوں ایم این ایز کو طلب کیا تھا، روزانہ کی بنیاد پر ٹرائل کرنے کا بھی حکم دیا تھا، میں تو روزانہ کی بنیاد پر ٹرائل کے لیے تیار ہوں ، آپ جاکر سٹے ختم کرائے۔عدالت نے کہا کہ تمام فریقین کی جانب سے جواب آچکا، ایک ہفتے کے اندر کیس نے ختم ہونا ہے، اگر میں 20 صفحات پر فیصلہ دوں اور کیس دوسرے ٹریبونل میں چلا جائے پھر کیا ہوگا، جب تک ہائی کورٹ کے اسٹے کا آرڈر فیلڈ میں ہے تو کچھ نہیں ہوسکتا۔

شعیب شاہین نے کہا کہ عدالتی آرڈر پر فریقین نے ابھی تک عمل درآمد ہی نہیں کیا، ای ایم ایس ریکارڈ جمع کرنے کے لئے ریٹرننگ افسر کو عدالت نے حکم دیا تھا۔جسٹس طارق محمود جہانگیری نے کہا کہ 22 کو چیف جسٹس نے سماعت کرنی ہے اگر اسٹے ختم ہوگیا تو ہم جاری رکھیں گے، اس کیس کو 24 کو رکھ لیتے ہیں آگے دیکھا جائے گا۔بعد ازاں، عدالت نے کیس کی سماعت 24 جولائی تک کیلئے ملتوی کر دی۔

واضح رہے کہ 11 جولائی کو اسلام آباد ہائی کورٹ نے وفاقی دارالحکومت کے الیکشن ٹریبونل کو قومی اسمبلی کے تینوں حلقوں ?این اے 46، این اے 47 اور این اے 48 کا باقاعدہ ٹرائل آگے بڑھانے سے روک دیا تھا۔پاکستان تحریک انصاف (پی ٹی آئی) نے اسلام آباد کی تینوں نشستوں کے انتخابی نتائج کو اسلام ا?باد ہائی کورٹ میں قائم الیکشن ٹریبونل میں چیلنج کررکھا ہے۔