Live Updates

ملک بھر میں جاری مون سون کی بارشوں کے دوران 104 افراد جاں بحق

طوفانی بارشوں سی490گھروں کو نقصان پہنچا ، 118مویشی سیلاب کی نذر ہو گئیں

اتوار 4 اگست 2024 20:20

ملک بھر میں جاری مون سون کی بارشوں کے دوران 104 افراد جاں بحق

اسلام آباد(اُردو پوائنٹ اخبارتازہ ترین - این این آئی۔ 04 اگست2024ء) نیشنل ڈیزاسٹر منیجمنٹ اتھارٹی (این ڈی ایم ای) نے کہا ہے کہ ملک بھر میں جاری مون سون کی بارشوں کے دوران 104افراد جاں بحق اور206 زخمی ہوگئے ہیں اور مجموعی طور پر 1490 گھروں کو نقصان پہنچا ہے۔این ڈی ایم اے نے ملک بھر میں جاری مون سون کی بارشوں کے دوران ہونے والے جانی و مالی نقصانات کی تفصیل جاری کر دی ہے، جس کے مطابق گزشتہ ایک ماہ سے جاری طوفانی بارشوں میں ملک کے مختلف علاقوں میں حادثات کے باعث 104 افراد جاں بحق اور 216 زخمی ہو ئے ہیں۔

رپورٹ میں بتایا گیا کہ طوفانی بارشوں سی490گھروں کو نقصان پہنچا اور 118مویشی سیلاب کی نذر ہو گئیں۔این ڈی ایم اے نے بتایا کہ مون سون کی طوفانی بارشوں سے سب سے زیادہ اموات 39 پنجاب میں ہوئیں، خیبر پختونخوا میں 34، سندھ میں22، بلوچستان میں5، آزاد کشمیر میں3 اور گلگت بلتستان ایک شخص کے جاں بحق ہونے کی تصدیق ہوئی ہے۔

(جاری ہے)

بارشوں میں ہونے والے نقصانات سے متعلق رپورٹ میں بتایا گیا کہ بارشوں کے دوران مختلف حادثات میں پنجاب میں 113، خیبر پختونخوا میں 79 ، آزاد کشمیر میں11، بلوچستان میں9 اور سندھ میں 3 افراد زخمی ہوئے۔

ملک بھر میں گزشتہ ایک ماہ کے دوران طوفانی بارشوں سے 126گھر منہدم اور 364کو جزوی نقصان پہنچا، خیبر پختونخوا میں382گھر، پنجاب میں 61، گلگت بلتستان میں22، سندھ میں13، آزاد کشمیر میں7 اور بلوچستان میں5گھر متاثر ہوئے۔