قانون کی عملدآری میں سیاہ فام افراد کو نسلی تعصب کا سامنا، ماہرین

یو این بدھ 2 اکتوبر 2024 00:45

اسلام آباد (اُردو پوائنٹ ۔ UN اردو۔ 02 اکتوبر 2024ء) انسانی حقوق پر اقوام متحدہ کے مقرر کردہ غیرجانبدار ماہرین نے کہا ہے کہ نفاذ قانون کے عمل میں اپنے حقوق کی پامالیوں کا سامنا کرنے والے افریقیوں اور افریقی النسل لوگوں کو عدم احتساب کے باعث کبھی انصاف نہیں مل سکا۔

ماہرین کا کہنا ہے کہ افریقیوں اور افریقی النسل لوگوں کے خلاف نفاذ قانون اور ضابطہ فوجداری کے ذریعے نسل پرستانہ سلوک اب بھی دنیا کے کئی ممالک میں عام ہے اور ایسا کرنے والوں کا احتساب نہیں ہوتا۔

نسل پرستانہ جرائم کے معاملے میں انصاف کے فروغ پر اقوام متحدہ کے ماہرین کے طریقہ کار کی سربراہ اکوا کوئنہیا نے کہا ہے کہ اس سلوک کا سامنا کرنے والوں کے سچائی، انصاف ازالے اور دوبارہ ایسا سلوک نہ ہونے کی یاد دہانی کے حق کی بمشکل ہی کبھی تکمیل ہوتی ہے۔

(جاری ہے)

تبدیلی کے لیے سفارشات

افریقیوں اور افریقی النسل لوگوں پر پولیس کے تشدد اور بدسلوکی سے متعلق متعدد اطلاعات سامنے آنے کے بعد ماہرین نے حکومتوں کو متاثرین کے لیے انصاف، احتساب اور نقصان کا ازالہ یقینی بنانے کے بہت سے اقدامات تجویز کیے ہیں

ان کا کہنا ہے کہ ممالک کو نسل پرستانہ اقدامات کی اطلاع دینے اور ایسے واقعات کی تحقیقات کا کا موثر طریقہ وضع کرنا چاہیے۔

نفاذ قانون کے عمل کی آزاد اور غیرجانبدارانہ نگرانی ہونی چاہیے اور متاثرہ لوگوں کی مدد کے لیے آزادانہ طریقہ ہائے کار لاگو کیے جانے چاہئیں۔

اقوام متحدہ کے طریقہ کار کے رکن وکٹر راڈریگز ریسکیا نے کہا ہے کہ ایسا بہت پہلے ہو جانا چاہیے تھا۔ اب ممالک کے لیے ایسے مضبوط ادارے بنانے میں مزید تاخیر کی گنجائش نہیں جو متاثرین کو موثر طور سے انصاف فراہم کریں، ان کے حقوق کی پامالیوں پر احتساب یقینی بنائیں اور لوگوں کے نقصان کی تلافی کر سکیں۔

اٹلی اور برازیل کی صورتحال پر رپورٹ

ماہرین نے جنیوا میں اقوام متحدہ کی کونسل برائے انسانی حقوق کو اس مسئلے پر اپنی رپورٹ پیش کی ہے جس کے ساتھ ان کے برازیل اور اٹلی کے دوروں سے متعلق رپورٹیں بھی شامل ہیں۔ ان میں افریقی النسل لوگوں پر پولیس کے تشدد اور بدسلوکی سے متعلق تفصیلات دی گئی ہیں۔

دونوں رپورٹوں میں یہ سفارشات بھی دی گئی ہیں کہ ان ممالک میں حکومتوں کو نفاذ قانون کا نظام نسلی تفریق سے پاک کرنے کے لیے کون سے اقدامات کرنا ہوں گے۔

ماہرین و خصوصی اطلاع کار

غیرجانبدار ماہرین یا خصوصی اطلاع کار اقوام متحدہ کی انسانی حقوق کونسل کے خصوصی طریقہ کار کے تحت مقرر کیے جاتے ہیں جو اقوام متحدہ کے عملے کا حصہ نہیں ہوتے اور اپنے کام کا معاوضہ بھی وصول نہیں کرتے۔