eتحریک منہاج القرآن لاہورکی مشاورتی کونسل کا اجلاس

ٓ صدر لاہور پروفیسر ذوالفقار علی کی کارکنان کو منہاج القرآن کے 44ویں یوم تاسیس کی مبارکباد

اتوار 20 اکتوبر 2024 18:15

cلاہور (اُردو پوائنٹ اخبارتازہ ترین - آن لائن۔ 20 اکتوبر2024ء) تحریک منہاج القرآن لاہورکی مشاورتی کونسل کا اجلاس صدر لاہور پروفیسر ذوالفقار علی کی صدارت میں منعقد ہوا۔ اجلاس میںتحریک منہاج القرآن لاہور کی تنظیم کے جملہ فورمز کے زونل، ضلعی، پی پی اور یو سیز کے صدور و ناظمین نے شرکت کی۔اجلاس میں ناظم لاہور امجد حسین چوہدری نے سابقہ تنظیمی کار کردگی اور آئندہ کے اہداف سے ضلعی عہدیداران کو آگاہ کیا۔

اجلاس میں دروس عرفان القرآن، حلقات درود اور لاہور میں جاری فلاحی منصوبہ جات کو مزید وسعت دینے کے حوالے سے بھی مشاورت کی گئی۔ سینئر نائب صدر ڈاکٹر سلطان محمود چودھری نے استقبالیہ کلمات میں شرکاء کو خوش آمدید کہا۔ انہوں نے کہاکہ لاہور کی ہر یونین کونسل میں مراکز علم اور حلقات درود قائم کیے جائیں گے۔

(جاری ہے)

ممبر سازی مہم اور عوامی رابطہ مہم شروع کی جائے گی۔

اجلاس سے خطاب کرتے ہوئے تحریک منہاج القرآن لاہور کے صدر پروفیسر ذوالفقار علی نے سابقہ کار کردگی پر تمام عہدیداران کو مبارکباد پیش کی اور آئندہ کے اہداف کے حصول کے لیے صدور و ناظمین کو مزید ہدایات جاری کیں۔ پروفیسر ذوالفقار علی نے شرکا کوتحریک منہاج القرآن کے 44ویں یوم تاسیس کی مبارکباد دیتے ہوئے کہاکہ منہاج القرآن اصلاح و احوال، تجدید و احیائے دین اور فروغ علم و امن کی تحریک ہے۔

شیخ الاسلام ڈاکٹر محمد طاہر القادری پوری دنیا میں دین اسلام کی حقیقی تعلیمات کو فروغ دے رہے ہیں۔انہوں نے کہا کہ تحریک منہاج القرآن کے ہر کارکن کا ہر عمل اسوہ رسولؐ کا نمونہ اور عظمت اسلاف کا ترجمان ہونا چاہئے۔دین اسلام خلوص نیت کی ترغیب دیتا ہے۔اگر ہم زندگی میں کسی اچھے اور نیک کام کی نیت کریں لیکن بعدازاں کسی رکاوٹ کے باعث نہ کرنے کے باوجود بھی ہمیں اس نیک نیتی کا اجر ملتا رہے گا۔

انہوں نے کہا کہ تمام ذمہ داران دئے گئے اہداف کی تکمیل کیلئے اپنی تمام تر توانائیاں صرف کر کے حقیقی کارکن ہونے کا ثبوت دیں۔ اجلاس میں محمد ثاقب بھٹی ، حاجی فرخ خان قادری، علامہ خلیل احمد حنفی، فہنیقہ ندیم، حاجی محمد امجد، محمد ریحان چوہدری، ناظم علی رحمت، میاں ممتاز حسین، معراج خالد، عثمان اختر اور محمد رمضان ایوبی سمیت ضلعی اور پی پی صدور و ناظمین نے شرکت کی۔