چینی خاتون اول پھنگ لی یوان کی فن لینڈ کے صدر کی اہلیہ کے ساتھ ملاقات، برفانی کھیلوں کے شعبوں میں تبادلے اور تعاون کو مضبوط کرنے کا عزم

بدھ 30 اکتوبر 2024 23:11

بیجنگ (اُردو پوائنٹ اخبارتازہ ترین - اے پی پی۔ 30 اکتوبر2024ء) چین کے صدر شی جن پھنگ کی اہلیہ پھنگ لی یوان نے فن لینڈ کے صدر کی اہلیہ سوزانا کے ساتھ بیجنگ میں ایک چائے کی نشست پر ملاقات کی ، جو چین کے سرکاری دورے پر فن لینڈ کے صدر سٹب کے ہمراہ موجود ہیں۔

(جاری ہے)

بد ھ کو چینی میڈ یا کے مطا بق پھنگ لی یوان نے کہا کہ اگلے سال چین اور فن لینڈ کے درمیان سفارتی تعلقات کے قیام کی 75ویں سالگرہ ہے اور وہ امید کرتی ہیں کہ دونوں فریق آرٹ اور برفانی کھیلوں کے شعبوں میں تبادلے اور تعاون کو مضبوط کریں گے اور فریقین کے درمیان دوستی کو مسلسل فروغ دیں گے۔

پھنگ لی یوان نے سوزانا کی فعال فلاحی سرگرمیوں کو سراہا اور کہا کہ چین اور فن لینڈ مفید تجربات شیئر کر سکتے ہیں۔ سوزانا نے دنیا بھر میں خواتین اور بچوں کی ترقی کو فروغ دینے کے لیے پھنگ لی یوان کی دیرینہ وابستگی کی تعریف کی اور فن لینڈ اور چین کے درمیان ثقافت اور دیگر شعبوں میں دوستانہ تبادلوں کو مزید فروغ دینے اور فریقین کے درمیان دوستی کو مزید گہرا کرنے میں اپنا کردار ادا کرنے پر آمادگی ظاہر کی۔