ضلعی انتظامیہ کی کارروائیاں، اوقاتِ کار کی خلاف ورزی پر 63 دکانیں سیل کر دیں

جمعہ 22 نومبر 2024 21:40

لاہور (اُردو پوائنٹ اخبارتازہ ترین - اے پی پی۔ 22 نومبر2024ء) ضلعی انتظامیہ لاہور نے اوقاتِ کار کی خلاف ورزی پر 63 دکانیں سیل کر دیں۔ تحصیل ماڈل ٹاؤن میں اسسٹنٹ کمشنر ماڈل ٹاؤن صاحبزادہ یوسف نے پانچ دکانیں ، اسسٹنٹ کمشنر سٹی بابر علی رائے نے 10 دکانیں ، تحصیل علامہ اقبال ٹاؤن میں اسسٹنٹ کمشنر خواجہ عمیر نے 29 دکانیں خلاف ورزی پر سیل کردیں۔

اسسٹنٹ کمشنر راوی طارق بشیر نے تحصیل راوی ، تحصیل رائیونڈ میں اسسٹنٹ کمشنر زینب طاہر نے پابندیوں پر عملدرآمد کروایا۔ ایم سی ایل اور ریونیو سٹاف نے بھی کارروائی میں حصہ لیا۔ تحصیل واہگہ زون میں اسسٹنٹ کمشنر عامر بٹ نے دو دکانیں ، تحصیل شالیمار میں اسسٹنٹ کمشنر ڈاکٹر انعم فاطمہ نے 14 دکانیں ،تحصیل نشتر زون میں اسسٹنٹ کمشنر محمد سلیم آسی نے تین دکانیں سیل کردیں۔

(جاری ہے)

ڈی سی لاہور نے عوام سے سموگ کے دوران احتیاطی تدابیر اختیار کرنے اور مکمل تعاون کی اپیل کی ہے۔ انہوں نے کہا کہ شہری غیر ضروری سفر سے گریز کریں ،ماسک کا استعمال یقینی بنائیں اور بچوں، بزرگوں اور بیمار افراد کو خاص طور پر سموگ کے مضر اثرات سے محفوظ رکھیں۔ ڈپٹی کمشنرنے کہا کہ فضائی آلودگی کے باعث شہریوں کی صحت کا خیال رکھنا اولین ترجیح ہے، تاجر برادری اسموگ اور فضائی آلودگی کے اثرات کم کرنے میں تعاون کریں۔

انہوں نے کہا کہ پابندیوں کی خلاف ورزی پر بلاامتیاز سخت کارروائیاں عمل میں لائی جائیں گی۔ ڈپٹی کمشنر لاہور نے کہا کہ شہری کسی بھی قسم کی متعلقہ معلومات کے حصول یا شکایت کی صورت میں ڈی سی آفس کنٹرول روم نمبر 03070002345 پر واٹس ایپ میسج یا ڈی سی آفس کے سوشل میڈیا پلیٹ فارمز پر میسج یا کمپلینٹ کی صورت میں رابطہ کر سکتے ہیں۔