عمران خان نے دھرنے میں بھی سول نافرمانی کی بات کی تھی، سینئر وزیرسندھ

عمران خان کی ذہنیت ہے اسٹیبلشمنٹ، عدلیہ ، الیکشن کمیشن سب ان کے کہنے پرچلیں، شرجیل میمن

جمعہ 6 دسمبر 2024 13:23

عمران خان نے دھرنے میں بھی سول نافرمانی کی بات کی تھی، سینئر وزیرسندھ

کراچی (اُردو پوائنٹ اخبارتازہ ترین - این این آئی۔ 06 دسمبر2024ء) سندھ کے سینیر وزیر شرجیل انعام میمن نے کہا ہے کہ پاکستان تحریک انصاف( پی ٹی آئی) کے بانی عمران خان کی ذہنیت ہے کہ اسٹیبلشمنٹ ، عدلیہ سب ان کے کہنے پر چلیں۔کراچی میں نیب کورٹ کے باہر میڈیا سے گفتگو کرتے ہوئے سینیر وزیر سندھ شرجیل انعام میمن کا کہنا تھا کہ پی ٹی آئی کی ذہنیت آمرانہ ہے۔

کل عمران خان کورٹ سے اٹھ کر چلے گئے۔ عدالتوں کو اس طرح جھکایا نہیں جا سکتا۔ مختلف سیاسی جماعتیں بھی عدالتوں کا سامنا کرتی آئی ہیں۔ جو ایسے مقدمات بناتے ہیں وہ خود بھی آج مقدمات کا سامنا کررہے ہیں۔ عدالتوں پراعتماد ہونا چاہیے انہیں متنازع نہیں بنانا چاہیے۔شرجیل میمن نے کہا کہ پی ٹی آئی نے ماضی میں بھی سول نافرمانی کا کہا تھا۔

(جاری ہے)

پی ٹی آئی کے پاس لوگوں کو دینے کے لیے صرف انتشار ہے۔ گورنر خیبرپختونخوا نے کل آل پارٹیز کانفرنس رکھی جس میں پی ٹی آئی شریک نہیں ہوئی حالانکہ یہ کام پی ٹی آئی کو خود کرنا چاہیے تھا۔ کے پی میں حالات خراب ہوتے جارہے ہیں مغرب کے بعد پولیس سڑکوں پر نظر نہیں آتی۔صوبائی سینیر وزیر نے مزید کہا کہ الیکشن کمیشن جب عمران خان کے کہنے پر نہیں چلا تو انہوں نے سب سے زیادہ متنازع سکندر سلطان راجا کو بنایا۔

عمران خان کی ذہنیت ہے اسٹیبلشمنٹ، عدلیہ اور الیکشن کمیشن سب ان کے کہنے پر چلیں۔ عمران خان نے دھرنے میں بھی سول نافرمانی کی بات کی تھی۔ عمران خان نے کہا تھا کہ ملک سے باہر سے پیسہ سرکاری ذرائع سے نہیں بلکہ حوالہ ہنڈی سے بھیجیں۔ ان کی سوچ کے ملک میں ہرچیز کو آگ لگا دی جائے۔شرجیل میمن نے کہا کہ آج بھی یہ مثبت سوچ کے ساتھ آجائیں اور اعتراف کریں کہ ہم نے عوام کو گمراہ کرنے کی کوشش کی ہے۔ پی ٹی آئی کے پاس نوجوانوں کو دینے کے لیے صرف انتشار ہے۔ منفی سوچ کبھی پائیدار نہیں ہوتی۔ پی ٹی آئی کی ترجیح یہ ہے کہ ہمیں کس طرح وفاق پر حملہ کرنا ہے۔ آئینی عدالتیں بنائی گئی ہیں۔ صوبہ سندھ نے پہل کی اور آئینی عدالتیں قائم کیں۔