محکمہ زراعت کی گندم کے کاشتکاروں کیلئے دوسرے پانی کے متعلق سفارشات جاری

جمعہ 10 جنوری 2025 13:50

فیصل آباد (اُردو پوائنٹ اخبارتازہ ترین - اے پی پی۔ 10 جنوری2025ء) محکمہ زراعت نے گندم کے کاشتکاروں کوسفارش کی ہے کہ وہ دھان، کپاس، مکئی اور کماد کے بعد کاشتہ فصل کو دوسرا پانی 80سے 90دن بعد لگائیں جبکہ پچھیتی کاشت کیلئے پہلا پانی شاخیں نکلتے وقت بوائی کے 20سے 25دن بعد، دوسرا پانی 70سے 80دن بعد گوبھ کے وقت اور تیسرا پانی 110سے 115دن بعد دانے کی دو دھیا حالت میں دیا جائے۔

ریسرچ انفارمیشن یونٹ ایوب زرعی تحقیقاتی ادارہ فیصل آبادکے ترجمان نے بتایا کہ گندم کی اچھی پیداوار حاصل کرنے کیلئے جڑی بوٹیوں کی تلفی انتہائی ضروری ہے۔ انہوں نے کہا کہ ایک اندازے کے مطابق جڑی بوٹیوں کی وجہ سے 14سے42فیصدتک پیداوار کم ہو جاتی ہے اور اگر جڑی بوٹیوں کی بر وقت تلفی کر دی جائے تو پیداوار میں 15سے25فیصد تک اضافہ ہو جاتا ہے۔

(جاری ہے)

انہوں نے کہا کہ کاشتکار پہلی آبپاشی کے بعد کھیت وتر حالت میں آنے پر دوہری بار ہیرو چلائیں، جڑی بوٹی مار زہروں کے سپرے کیلئے 100سے120لیٹر پانی فی ایکڑ استعمال کریں اور سپرے صاف اور خوشگوار موسم میں کریں۔انہوں نے کہا کہ دھند، بارش اور تیز ہواکی صورت میں سپرے ہر گز نہ کیا جائے اور خیال رکھا جائے کہ دوران سپرے فصل کا کوئی حصہ دوہری بار سپرے نہ ہو اور کوئی حصہ سپرے سے رہ بھی نہ جائے۔

انہوں نے زمینداروں، کاشتکاروں،کسانوں سے کہا کہ وہ گندم کی بمپر کراپ کے حصول اور فصل کو ہر قسم کی بیماریوں سے بچانے کیلئے گندم کی فصل پر دوپہر کے وقت ٹی جیٹ نوزل کے ذریعے سپرے یقینی بنائیں اور جڑی بوٹیوں کی تلفی یقینی بنائیں۔ انہوں نے کہا کہ جڑی بوٹیوں کی تلفی اسلئے بھی ضروری ہے کہ اگر جڑی بوٹیوں کا بیج ایک سال پک جائے تو یہ 7سال تک متواتر اگتا اور فصل کو نقصان پہنچاتا رہتا ہے۔انہوں نے کہا کہ دنبی سٹی اور جنگلی جئی کیلئے محکمہ زراعت کے فیلڈ سٹاف کی مشاورت سے سپرے کیا جائے۔انہوں نے کہا کہ اس ضمن میں محکمہ زراعت کی ہیلپ لائن سے بھی استفادہ کیا جا سکتا ہے۔