پاکستان میں اعلیٰ معیار کی مچھلی دستیاب،یہ صحت کے لیے بہت مفید ہے،زرعی ماہرین

بدھ 15 جنوری 2025 16:44

لاہور (اُردو پوائنٹ اخبارتازہ ترین - اے پی پی۔ 15 جنوری2025ء) جامعہ زرعیہ فیصل آبادکے ماہرین ماہی پروری نے کہا کہ پاکستان میں اعلیٰ معیار کی حامل مچھلی کی مختلف اقسام بشمول سنگھاڑی،رہو، سول، بام،ترکنڈا،ٹراؤٹ، ڈمرہ، ملی،تھیلا وغیرہ پائی جاتی ہیں جن کی افزائش کے نظام میں بہتری لا کر ان کی پیداوار میں بھی اضافہ کیاجاسکتاہے ، مچھلی ایک صحت منداورانسان کیلئے مفید خوراک ہے لیکن اس کی پاکستان میں مارکیٹنگ سب سے بڑا مسئلہ ہے۔

انہوں نے بتایاکہ مچھلی کی پرورش اور تجارت میں حائل رکاوٹوں کے خاتمے کیلئے مؤثرپالیسی تشکیل دی جا رہی ہے۔انہوں نے کہاکہ ٹھنڈے اور سمندری پانی کی مچھلیوں کی تجارت اور اس میں حائل رکاوٹوں کو دور کرکے قیمتی زرمبادلہ بھی حاصل کیاجاسکتاہے۔

(جاری ہے)

انہوں نے کہاکہ پاکستان میں بہتر معیار کی مچھلی کی قیمت انتہائی زیادہ ہے اس لئے لوگ سستی مچھلی کی خرید کو ترجیح دیتے ہیں۔

انہوں نے کہاکہ اگرچہ پاکستان میں فارمی مچھلی بھی وافر مقدار میں دستیاب ہے لیکن اس کا ذائقہ اور معیار دریائی مچھلی کے برابر نہ ہے اس لئے لوگ دریاکی مچھلی کو زیادہ پسند کرتے ہیں۔انہوں نے کہاکہ اگر پاکستان کے دریاؤں میں مچھلی کی افزائش بہتر بنانے کیلئے نئی ہیچریاں قائم کر دی جائیں تو ملکی ضرورت پوری کرنے کے علاوہ اضافی مچھلی برآمد بھی کی جاسکتی ہے۔