گوجرانوالہ نجی کالج کے 55رکنی وفد کا الحمراآرٹ میوزیم کا دورہ

جمعرات 23 جنوری 2025 15:31

لاہور (اُردو پوائنٹ اخبارتازہ ترین - اے پی پی۔ 23 جنوری2025ء) گوجرانوالہ کے نجی کالج کے 55رکنی وفد نے الحمرا ماڈرن آرٹ میوزیم کا دورہ کیا۔ترجمان کے مطابق الحمرا میوزیم افسران نے وفد کا استقبال کیا اورمیوزیم میں آویزاں کا م پر بریف کیا جبکہ وفد نے فن پاروں میں گہری دلچسپی ظاہر کی۔چیئرمین الحمرارضی احمد نے کہا ہے کہ آرٹ فن پارے کسی بھی قوم کی اعلی اقدارکے آئینہ دار ہوتے ہیں، فن پاروں سے ہماری قوم کی ہزار ہاسالہ تہذیب و تمدن،ثقافت اور معاشرت بخوبی جھلکتی ہیں ۔

انہوں نے کہاکہ پاکستان مصوروی کے شعبے میں بڑے بڑے نام پیدا کرنے میں ایک زرخیز ترین خطہ رہا ہے۔ایگزیکٹوڈائریکٹر الحمرا توقیر حیدر کاظمی نے کہاکہ الحمرا ماڈرن آرٹ میوزیم میں عالمی شہرت یافتہ 100سے زائدآرٹسٹوں کے 200سے زائدفن پارے رکھے گئے ہیں، الحمرا آرٹ میوزیم ہماری نئی نسل کو اپنی عظمت رفتہ سے شناسا کرنے کے لئے کامیاب کو ششیں کر رہا ہے۔

(جاری ہے)

انہوں نے کہاکہ نامور مصوروں عبد الرحمن چغتائی،استاد اللہ بخش،صادقین،شاکرعلی، ایس صفدر،حنیف رامے،شمزا،احمد پرویز،کولن ڈیوڈ،اسلم کمال، جمی انجینئر،میری کترینا،کامل خان ممتاز،انا مولیکا احمد،سعید اختر،زبیدہ آغا،خالد اقبال ودیگر آرٹسٹوں کاکام الحمرا ماڈرن آرٹ میوزیم میں زینت ہے۔مختلف تعلیمی اداروں کے وفود بھی الحمرا آرٹ میوزیم کے دورےکرتے رہتے ہیں ۔

انہوں نے کہاکہ طلبہ کواس میوزیم میں رکھے گئے فن پاروں کی مدد سے اپنے آئیڈیل کے انتخاب میں آسانی ہو رہی اورالحمرا ماڈرن آرٹ میوزیم نئی نسل کے آرٹسٹ فن کو نئے نئے زاویے عطا کررہا ہے۔انہوں نے کہاکہ الحمرا آرٹ میوزیم کی بدولت فائن آرٹ کے طلبہ کواپنے تھیسز کے موضوعات کے انتخاب میں بھی آسانی ہورہی ہے اوردنیا بھر سے سکالرز،محقق،سیاح،طالب علم و مورخ اس میوزیم کو دیکھنے کیلئے آتے ہیں۔