Live Updates

چینی قونصل جنرل کا جیو پاک ہسپتال لاہور کا دورہ

سیلاب متاثرین سے اظہار یکجہتی

شاہد نذیر چودھری بدھ 3 ستمبر 2025 05:47

چینی قونصل جنرل کا جیو پاک ہسپتال لاہور کا دورہ

لاہور(اُردو پوائنٹ اخبارتازہ ترین۔ 3 ستمبر 2025ء) چینی قونصل جنرل لاہور مسٹر ژائو شیرین نے جیو پاک ہسپتال لاہور کا دورہ کیا اور ہسپتال میں سیلاب متاثرین کے لئے قائم کئے گئے امدادی کیمپ کا جائزہ لیا، جہاں تقریباً 300 متاثرہ افراد کو طبی سہولیات، ادویات اور پناہ فراہم کی جا رہی ہیں۔اس موقع پر انہوں نے چیریٹی کے ادارے جیو پاک کی بھر پور مدد کا اعلان بھی کیا۔

استقبالیہ تقریب میں جیو پاک ہسپتال کے چیئرمین شاہد نذیر چودھریؔ، سی او اور فاؤنڈر عبدالشکور، دی نور پراجیکٹ کے سی او امجد وٹو اور پنجاب رینجرز ہسپتال کے ایم ایس بریگیڈیئر آفتاب نے معزز مہمان کا پرتپاک خیر مقدم کیا اور انہیں ہسپتال میں قائم چیریٹی کیمپ کا تفصیلی دورہ کرایا۔

(جاری ہے)

اس موقع پر قونصل جنرل مسٹر ژائو شیرین نے متاثرین سے ملاقات کی اور ان کے مسائل سنے۔

انہوں نے کہا:

"پاکستان اور چین آہنی بھائی ہیں۔ مشکل کی ہر گھڑی میں ہم ایک دوسرے کے ساتھ کھڑے ہیں۔ سیلاب سے متاثرہ پاکستانی عوام کی مدد کے لئے چین نہ صرف حکومتی سطح پر بلکہ چینی بزنس کمیونٹی کے ذریعے بھی امدادی سرگرمیوں میں شریک ہے۔ جیو پاک ہسپتال اور اس کی ٹیم نے جس جذبے کے ساتھ سیلاب متاثرین کی خدمت کی ہے، یہ پاک چین دوستی کی حقیقی روح کی عکاسی ہے۔

جیو پاک کے سی او نے کہا کہ ہم شکر گزار ہیں کہ چین کے معزز نمائندے نے یہاں آ کر متاثرین کی ہمت بندھائی۔ جیو پاک ہسپتال ہر حال میں انسانیت کی خدمت جاری رکھے گا۔ انہوں نے کہا کہ یہ ادارہ عوامی خدمت کے لئے قائم کیا گیا ہے۔ سیلاب سے متاثرہ خاندانوں کے زخموں پر مرہم رکھنا ہمارا فرض ہے اور ہمیں خوشی ہے کہ ہمارے دوست ملک چین نے اس مشن میں ہمارا ساتھ دیا۔

دی نور پراجیکٹ کے سی او امجد وٹو نے کہاکہ پاکستان اور چین کی یہ شراکت داری ایک مثال ہے۔ ہم اپنے متاثرہ بھائیوں کی مدد میں کوئی کمی نہیں آنے دیں گے۔انہوں نے بتایا کہ دی نور کی جانب سے جیو ہسپتال میں مقیم متاثرین کو کھانا اور کپڑے فراہم کئے جارہے ہیں۔

پنجاب رینجرز ہسپتال کے ایم ایس بریگیڈیئر آفتاب نے کہاکہ یہ یکجہتی اس بات کا ثبوت ہے کہ انسانیت کی خدمت سب سے بڑی ترجیح ہونی چاہیے۔

چیرمین جیو پاک ہسپتال شاہد نذیر چودھری نے کہا کہ یہ دورہ نہ صرف پاک چین تعلقات کی مضبوطی کا عکاس ہے بلکہ اس بات کا ثبوت بھی ہے کہ مشکل کی گھڑی میں دونوں ممالک ایک دوسرے کے شانہ بشانہ کھڑے ہیں۔ جیو پاک ہسپتال اور اس کی انتظامیہ نے سیلاب متاثرین کے لئے جو اقدامات کئے ہیں وہ معاشرتی خدمت کی ایک روشن مثال ہیں۔

اس دورہ میں چین بزنسل کونسل کے نمائندے بھی قونصل جنرل چین کے ساتھ وفد کی سورت میں آئے تھے۔

تقریب کے بعد چینی قونصل جنرل مسٹر ژائو شیرین خصوصی طور پر لاہور کے علاقے موہلنوال گئے، جہاں جیو پاک ہسپتال کی ٹیم کے ہمراہ انہوں نے متاثرین میں امدادی سامان تقسیم کیا۔ اس موقع پر کھانے پینے کی اشیاء، ادویات اور ضروریات زندگی کا سامان بانٹا گیا، جس سے متاثرین نے بھرپور تشکر کا اظہار کیا۔