چھوٹے بڑے ڈیم اتفاق رائے کے بغیر نہ بنائیں، بیرسٹر گوہر

راولپنڈی (اُردو پوائنٹ اخبارتازہ ترین - این این آئی۔ 02 ستمبر2025ء)چیئرمین پاکستان تحریک انصاف بیرسٹر گوہر نے کہا ہے کہ جب نہریں اتفاق رائے کے بغیر نہیں بناسکتے تو چھوٹے بڑے ڈیم بھی اتفاق رائے کے بغیر نہ بنائیں، ڈیم اتفاق رائے سے بنیں۔اڈیالہ جیل کے باہر میڈیا سے گفتگو میں بیرسٹر گوہر نے کہا کہ ڈیمز بننا ضروری ہیں لیکن ڈیمز اتفاق رائے سے بننے چاہئیں۔

انہوں نے کہا کہ سیلاب نے ملک کا نیا نقشہ پیش کیا ہے، کینالز کے معاملے پر بھی مشترکہ مفادات کونسل نے اتفاق رائے پر زور دیا ہے۔چیئرمین پی ٹی آئی نے کہا کہ قدرتی آفات کو روکنا ناممکن ہے لیکن اس کے تدارک کیلئے کام ہونا چاہیے، ڈیمز بننا ضروری ہیں لیکن ڈیمز اتفاق رائے سے بننے چاہئیں۔انہوںنے کہاکہ تحریک انصاف پنجاب کے سیلاب زدگان کے ساتھ ہے، سیلاب پر سیاست نہیں ہونی چاہیے، عوام کو ریلیف چاہیے اور مریم نواز کو پبلسٹی کی پڑی ہے۔

(جاری ہے)

بیرسٹر گوہر نے کہا کہ دہشت گردی کے خلاف نیشنل ایکشن پلان کی طرز پر سیلاب پر بھی نیشنل ایکشن پلان بننا چاہیے۔انہوں نے کہا کہ گزشتہ ہفتے ملاقات دی گئی، اس کے بعد کیسز بھی ملتوی کئے گئے، ملاقاتوں پر پابندی نہیں ہونی چاہیے، وکلا اور لیڈرشپ کی ملاقات ہونی ضروری ہے۔چیئرمین پی ٹی آئی نے کہا کہ بانی پی ٹی آئی کا حق ہے وہ اپنے لوگوں سے ملیں، ملاقاتوں پر اسلام آباد ہائی کورٹ کے واضح احکامات ہیں، احمد اویس سینئر وکیل ہیں، نیاز اللہ نیازی سب کے نام فہرست میں ہیں۔

انہوںنے کہاکہ اراکین اسمبلی کے استعفے دینا سیاست کا حصہ ہے، 190 سے 76 نشستوں پر آنے کے باوجود ہم اس سسٹم میں رہے، اسپیس نہیں دی جا رہی، ہماری آواز کو دبایا جارہا ہے۔بیرسٹر گوہر نے کہا کہ اراکین اسمبلی اپنے لیڈر کیلیے احتجاج کرتے ہیں تو پارلیمنٹ کے دروازے بند کر دیے جاتے ہیں، بانی پی ٹی آئی اور ان کی اہلیہ جیل میں ہیں، ان کے بھانجے بھی جیل میں ہیں۔

انہوں نے کہا کہ سرکار نے پوری فیملی کو تنہا کر دیا ہے، ایک بڑی سیاسی جماعت کے ساتھ ایسا رویہ افسوسناک ہے، ہمارے رہنماوں عمر ایوب، احمد خان بچھر اور شبلی فراز کو نا اہل کیا گیا۔چیئرمین پی ٹی آئی نے کہا کہ بانی کے کیسز کورٹ کچہری والے نہیں، سیاسی ہیں، پارٹی دیوار کے ساتھ لگ گئی ہے، اب بس ہونا چاہیے۔انہوںنے کہاکہ لگ نہیں رہا حالات بہتری کی طرف جارہے ہیں، ہم مایوس نہیں ہیں، جدوجہد کرتے رہیں گے، پی ٹی آئی کا نام تبدیل نہیں ہو رہا، ہماری درخواست الیکشن کمیشن میں موجود ہے۔

بیرسٹر گوہر نے کہا کہ ہمارا مطالبہ ہے ہمارا کیس سنا جائے، ڈیڑھ سال ہوگیا سب جماعتوں کو سرٹیفکیٹ ملا سوائے ہمارے، حکومتی بینچز پر موجود لوگ کہتے ہیں مینڈیٹ پی ٹی آئی کا ہے۔انہوں نے کہا کہ پی ٹی آئی نے ہمیشہ پاکستان کی خارجہ پالیسی کی حمایت کی ہے، ہم نے ہمیشہ کہا ہے پاکستان ہر قسم کی دہشت گردی کی مذمت کرتا ہے۔چیئرمین پی ٹی آئی نے کہا کہ پاکستان کو چاہیے بھارت کو ہر فورم پر بے نقاب کرے، پاکستان میں دہشت گردی کے پیچھے بھارت کا ہاتھ ہے،حالیہ جنگ میں بھارت کو شکست ہوئی، اسے آئندہ بھی شکست کا سامنا ہو گا۔