فیصل آباد ،کاشتکاروں کو گھیا کدو کی فیصل آباد گول اور لوکی اقسام کی کاشت فروری کے آغاز سے شروع کرنے کی ہدایت

فیصل آباد (اُردو پوائنٹ اخبارتازہ ترین - اے پی پی۔ 27 جنوری2025ء) کاشتکاروں کو گھیا کدو کی فیصل آباد گول اور لوکی اقسام کی کاشت فروری کے آغاز سے شروع کرنے کی ہدایت کی ہے۔ڈائریکٹرمحکمہ زراعت توسیع فیصل آبادچوہدری خالد محمود نے بتایا ہے کہ میدانی علاقوں کے کاشتکار اچھی روئیدگی والا 2سے اڑھائی کلوگرام بیج فی ایکڑاستعمال اور پہلی فصل فروری میں کاشت کرنا شروع کردیں تاکہ بروقت کاشتہ فصل کے باعث اچھی پیداوار حاصل کی جاسکے۔

انہوں نے کہا کہ میدانی علاقوں میں عام طور پرگھیا کدو کی3 فصلیں کاشت کی جاتی ہیں جن میں پہلی فصل فروری ومارچ، دوسری جولا ئی و اگست جبکہ تیسری فصل اکتوبر کے آ خر یا نومبر کے شروع میں کاشت کی جاتی ہے۔انہوں نے بتایاکہ گھیا کدو کی2 اقسام کاشت کی جاتی ہیں جن میں ایک قسم گول اور دوسری لمبی ہوتی ہے جسے لوکی بھی کہتے ہیں جو زیادہ ترپہاڑی علاقوں میں کاشت کی جاتی ہے۔

(جاری ہے)

انہوں نے بتایا کہ ترقی دادہ اقسام میں فیصل آباد گول زیادہ پیداوار دینے والی قسم ہے۔انہوں نے کہاکہ زرخیز میرا زمین جس میں نامیاتی مادہ وافر مقدار میں موجود ہو اور پانی دیر تک جذب رکھنے کی صلاحیت رکھتی ہو موزوں ہے تاہم تھور اور سیم زدہ زمینو ں میں اسے کاشت نہیں کرنا چاہئے۔انہوں نے کہا کہ کاشتکار بوائی سے ایک ماہ پہلے 10سے 15ٹن گوبر کی گلی سڑی کھاد ڈال کر زمین میں اچھی طرح ملا دیں اور بعد میں کچی راؤنی کے بعد وتر آنے پر زمین میں ہل اور سہاگہ چلائیں اس طرح کھیت میں موجود جڑی بوٹیوں کے بیج اگ آئیں گے جو کاشت کے وقت زمین کی تیاری کے دوران آسانی سے تلف کئے جاسکتے ہیں۔

انہوں نے کہاکہ کاشتکار بوائی کے وقت3 سے4 بار ہل اور سہاگہ چلائیں تاکہ زمین نرم اور بھربھری ہو جائے نیز زمین کا ہموار ہونا بھی بہت ضروری ہے۔انہوں نے کہا کہ کاشتکار زمین کی تیاری کے بعد کھیت میں 3 سے4میٹر کے فاصلے پر ڈوری سے نشان لگائیں اور ان نشانوں کے دونوں اطراف4 بوری سنگل سپر فاسفیٹ، ایک بوری امونیم سلفیٹ اور ایک بوری پوٹاش یا ڈیڑھ بوری ڈی اے پی اور ایک بوری پوٹاش فی ایکڑ ملا کر ڈال دیں، بعد ازاں نشانوں سے مٹی اٹھا کر پٹڑیاں بنائیں لیکن اس بات کا خاص طور پر خیال کریں کہ پٹڑیوں کے درمیان والی نالی 40 سے50 سینٹی میٹر چوڑی اور 20 سے 25 سینٹی میٹر گہری ہواس طرح زمین کاشت کےلئے تیار ہو جاتی ہے۔

انہوں نے کہاکہ پٹڑی کے دونوں کناروں پر40سے 50سینٹی میٹرکے فاصلہ پر2،2 بیج مناسب گہرائی پر بذریعہ چوکا لگائے جائیں اور اگر کاشت سے 8سے10 گھنٹے قبل بیج کو پانی میں بھگو دیں تو اس کا اگاؤ بہت اچھا ہو جاتا ہے۔