فیصل آباد ، جامعہ زرعیہ نے سویابین کی نئی اقسام تیار کرلیں

جمعرات 30 جنوری 2025 16:59

فیصل آباد (اُردو پوائنٹ اخبارتازہ ترین - اے پی پی۔ 30 جنوری2025ء) جامعہ زرعیہ فیصل آباد کے زرعی سائنسدانوں اور ماہرین زراعت نے سخت محنت کے بعدسویابین کی نئی اقسام تیار کی ہیں جنہیں سویا بین کی ملکی درآمد سے نجات دلانے کیلئے کسانوں میں رواج دیا جا رہا ہے جبکہ جامعہ ہذانے واشنگٹن سٹیٹ یونیورسٹی کے تعاون سے ماحولیاتی تبدیلیوں کے خلاف قوت مدافعت والی گندم کی اقسام بھی تیار کی ہیں جو ایک اہم سنگ میل ثابت ہوں گی۔

اسی طرح یونیورسٹی نے جینیاتی طور پر تبدیل شدہ گنے کی زیادہ پیداوار کی حامل اقسام متعارف کروائی ہیں جن میں حشرات اور جڑی بوٹیوں کے خلاف قوت مدافعت ٹرانسجینک گنے کی اقسام شامل ہیں جواعلیٰ خصائص کی حامل اور دنیا بھر میں برازیل کے بعد گنے کی دوسری جنیٹیکل موڈیفائیڈ اقسام ہیں ہے۔

(جاری ہے)

جامعہ زرعیہ فیصل آباد کے وائس چانسلرپروفیسر ڈاکٹر محمد سرور خاں نے بین الاقوامی شراکت کاری بارے بتایا کہ یونیورسٹی میں پاک کوریا نیوٹریشن سنٹر، سنٹر فار ایڈوانسڈ سٹڈیز، چائنیز کنفیوشس انسٹی ٹیوٹ، ڈی ایٹ سنٹر اور آئی ایس ٹی اے سیڈ لیب موجود ہے۔

انہوں نے کہا کہ ہمیں ملک میں روایتی فصلات کے ساتھ ساتھ ہائی ویلیو کراپس کو بھی فروغ دینا ہو گا۔ انہوں نے اس ضرورت پربھی زور دیا کہ زراعت کے حقیقی مسائل کے حل کیلئے کمیشنڈ تحقیق کو پروان چڑھاناہوگا۔پروفیسر ڈاکٹر محمد سرور خاں نے کہا کہ پاکستان میں 90فیصد سے زائد چھوٹے کاشتکار ہیں لہٰذا خصوصاً چھوٹے کاشتکاروں تک جدید ٹیکنالوجی کو پہنچانا وقت کی اہم ترین ضرورت ہے تاکہ پیداوار میں اضافے اور کسانوں کی معاشی حالت کو بہتر بنایا جا سکے۔