کاشتکاراگلے ہفتے تلسی کی کاشت شروع کردیں،جامن کیلئے کھاد کا متناسب استعمال بھی کیا جا ئے، محکمہ زراعت

پیر 10 فروری 2025 17:16

فیصل آباد (اُردو پوائنٹ اخبارتازہ ترین - اے پی پی۔ 10 فروری2025ء) کاشتکاروں کواگلے ہفتے تلسی کی کاشت شروع کرنے کی ہدایت کی گئی ہے اور کہاگیاہے کہ وسط فروری سے لیکر وسط مارچ تک تلسی کی کاشت کا وقت انتہائی موزوں ہوتاہے تاہم کاشت اپریل کے آخر تک بھی مکمل کی جا سکتی ہے۔محکمہ زراعت توسیع فیصل آباد کے اسسٹنٹ ڈائریکٹرڈاکٹر خالد اقبال نے بتایاکہ تلسی کا تعلق پودینے کے خاندان سے ہے جو ایک انتہائی کثیر الفوائد ادویاتی پودا ہے۔

انہوں نے بتایاکہ تلسی کے تازہ پتے چمکدار سبز رنگ کے تقریباً ڈیڑھ انچ لمبے ہوتے ہیں۔ انہوں نے بتایاکہ تلسی کئی قسم کے بخاروں، نزلہ،ذکام، کھانسی اور سانس کی بیماریوں کا شافی علا ج ہے۔ انہوں نے کہاکہ کاشتکار تلسی کی کاشت کیلئے میرا زمین کا انتخاب کریں اور شرح بیج 3کلوگرام فی ایکڑ رکھی جائے۔

(جاری ہے)

انہوں نے جامن کے کاشتکاروں اور باغبانوں کوبھی ہدایت کی کہ وہ جامن کے پودوں کی مناسب افزائش نسل کیلئے کھادوں کا متناسب استعمال کریں کیونکہ کھادوں کے موزوں اور متناسب استعمال سے جامن کے پودے کی اچھی بڑھوتری یقینی ہو سکتی ہے۔

انہوں نے بتایاکہ جامن کے چھوٹے پودوں کو گوبر کی گلی سڑی کھاد 20سے 30کلو گرام فی پودا جبکہ بڑے پودوں کو 50 سے55 کلوگرام فی پودا ڈالنی چاہیے۔ انہوں نے کہاکہ جامن کے چھوٹے پودوں کو ایک پاؤ یوریا، ایک پاؤ ڈی اے پی، آدھا کلوگرام ایس او پی کھاد فی پودا بھی ڈالنی چاہیے جبکہ بڑے پودوں میں پھل آنے سے قبل کھاد کی شرح 3پاؤ یوریا، 3 پاؤ ڈی اے پی اور 3 پاؤ ایس او پی فی پودا ہوتی ہے۔

انہوں نے بتایاکہ اوائل عمری میں جامن کے پودے کو زیادہ پانی کی ضرورت ہوتی ہے اسلئے 7سے10دن کے وقفہ سے پانی دیناچاہیے۔ انہوں نے کہاکہ پھل کی بڑھوتری کے ایام میں جامن کے پودے کو ضرور آبپاشی کرنی چاہیے۔ انہوں نے کہاکہ کاشتکار مزید مشاورت، رہنمائی کیلئے فری ایگریکلچرل ہیلپ لائن سے بھی رابطہ کر سکتے ہیں۔