کنگی گندم پر حملے کی صورت میں فی ایکڑپیداوار میں 30 فیصد تک کمی کا باعث بن سکتی ہے،محکمہ زراعت

جمعرات 13 فروری 2025 18:38

سیالکوٹ (اُردو پوائنٹ اخبارتازہ ترین - اے پی پی۔ 13 فروری2025ء) ڈپٹی ڈائریکٹر پیسٹ وارننگ اینڈ کوالٹی کنٹرول آف پیسٹی سائیڈز ڈاکتر مقصود احمد نے کہا ہے کہ صوبہ پنجاب کے مختلف اضلاع میں کاشتہ گندم کی فصل پرکنگی کا حملہ مشاہدہ میں آیا ہے جس کی شدت زیادہ تر کم درجہ کی ہے۔اے پی پی سے گفتگو کرتے ہوئے انہوں نے بتایا کہ گندم کی زرد کنگی کے پھیلاؤ کیلئے موزوں درجہ حرارت10 تا20ڈگری سینٹی گریڈ ہے۔

اس بیماری کا حملہ عام طور پر پتوں پر ہی ہوتا ہے جبکہ انتہائی شدید حملے کی صورت میں سٹے بھی متاثر ہوتے ہیں۔اس کی پہچان یہ ہے کہ پودے کے پتوں پر زرد رنگ کے چھوٹے چھوٹے دھبے متوازی قطاروں میں یا لائنوں میں صف بستہ ہوتے ہیں۔ وبائی حملے کی صورت میں اس کا نقصان بھوری کنگی سے کہیں زیادہ ہوتا ہے۔

(جاری ہے)

شدید حملے کی صورت میں نقصان 20 تا 50 فیصد تک ہو سکتا ہے۔

بھوری کنگی کے پھیلاؤکیلئے موزوں ترین درجہ حرارت20 تا25 ڈگری سینٹی گریڈ ہے۔اس بیماری کا حملہ عام طور پر پودے کے پتوں پر ہوتا ہے جس کی وجہ سے خاکی رنگ کے دھبے لائنوں کی بجائے بے ترتیب اور منتشر ہوتے ہیں۔ بڑھوتری کی اگیتی حالت میں حملہ ہونے پر پودے کمزور ہو جاتے ہیں اور پودے کا خوراک بنانے کا عمل متاثر ہوتا ہے۔ سٹے کو خوراک دینے والے پتے پر حملہ کی صورت میں پیداوار میں کمی واقع ہوتی ہے۔

وبائی صورت اختیار کرنے پر یہ بیماری گندم پر حملے کی صورت میں فی ایکڑپیداوار میں 30 فیصد تک کمی کا باعث بن سکتی ہے۔ انہوں نے مزید کہا ہے کہ کنگی کے کنٹرول کے لئے کاشتکار گندم کی فصل کا باقاعدگی سے معائنہ کریں۔ کنگی سے متاثرہ پتوں کو کاٹنے کے بعد شاپر میں ڈال کر احتیاط سے گڑھا کھود کر زمین میں دبا دیں۔اس کے علاوہ گندم کے کاشتکار فصل کے وقفہ برداشت کو مدِ نظر رکھتے ہوئے محکمہ زراعت پنجاب کے مقامی زرعی ماہرین کے مشورہ سے فصل کے حملہ شدہ پتوں پر مناسب پھپھوندکش زرعی ادویات کا سپرے کریں۔