بہاریہ موسم میں اگلی فصل کےلئے مکئی کی ترقی دادہ سنتھیٹک و دوغلی اقسام کاشاندار بیج آسانی سے تیار کیاجاسکتاہے، ڈاکٹرعامرصدیق

منگل 18 فروری 2025 12:03

فیصل آباد (اُردو پوائنٹ اخبارتازہ ترین - اے پی پی۔ 18 فروری2025ء) موسم بہار اور خریف میں بہاریہ مکئی کی کاشت سے غلہ دار اجناس کی پیداوارمیں خاطر خواہ اضافہ کیاجاسکتاہے جبکہ بہاریہ موسم میں اگلی فصل کےلئے مکئی کی ترقی دادہ سنتھیٹک اور دوغلی اقسام کاشاندار بیج آسانی سے تیار کرنے میں بھی مدد مل سکتی ہے لہٰذا کاشتکارفروری کے آخر تک بہاریہ مکئی کی کاشت مکمل کرلیں تاکہ انہیں اچھی پیداوارکاحصول یقینی ہوسکے۔

ڈاکٹرعامرصدیق اسسٹنٹ ڈائریکٹرزراعت توسیع فیصل آبادنے کاشتکاروں سے کہا کہ مکئی کی کاشت کےلئے بھاری میرازمین کاانتخاب کریں جو پانی بخوبی جذب کرنے کی صلاحیت رکھتی ہو۔ انہوں نے کہاکہ اگر ڈرل یا پلانٹر کے ساتھ ہموار کھیت میں فصل کاشت کرنی ہو توکاشتکار 12 سے 15 کلو گرام فی ایکڑ بیج استعمال کرکے اسی وتر میں کریں اور اگر وٹوں پر کاشت کرنی ہو تو پھر ٹریکٹر کے ساتھ وٹیں بناکر 8 سے 10 کلو گرام بیج کا ایک ایک دانہ مناسب فاصلہ پر لگاکر پانی لگا ئیں لیکن پہلا پانی لگانے میں احتیاط کریں کہ پانی زیادہ اونچا وٹوں پر نہ چڑھ جائے ورنہ اگاؤ متاثر ہوگا یا پھر وٹوں کو پانی لگا کر مکئی کے بیج کا ایک ایک دانہ پانی کی ریز پر لگا ئیں اس طرح بیج کا اگاؤ بہترین ہوگا اور فصل سے مطلوبہ پیداوار حاصل ہوسکے گی۔

(جاری ہے)

انہوں نے بتایا کہ مکئی کی کا شت کےلئے بھاری میرا زمین جو پا نی کو بخوبی جذب کرسکے اور اس کی پی ایچ 7.5 کے قریب ہو، نہا یت موزو ں ہے۔انہوں نے کہاکہ مکئی کی اچھی پیداوارکےلئے کھیت کی سطح ہموار ہونا بہت ضروری ہے تاکہ پانی ایک جیسا لگے چونکہ اس موسم میں زیادہ تر مکئی وٹوں پر کاشت کی جاتی ہے اس لئے اگر کھیت ہموار نہیں ہوگا تو پانی لگانے سے کہیں تو پانی وٹوں کے اوپر چڑھ جائے گا اور کہیں نیچے رہ جائے گا جس سے نہ صر ف اگاؤ متاثر ہوگا بلکہ بعد میں بڑھوتری بھی متاثر ہوگی۔