محکمہ لائیو سٹاک نےمویشی پال حضرات، کسانوں، کاشتکاروں کی مشاورت سے منصوبوں پر عملدرآمد کے لئے اقدامات شروع کر دیئے

منگل 18 فروری 2025 14:51

فیصل آباد (اُردو پوائنٹ اخبارتازہ ترین - اے پی پی۔ 18 فروری2025ء) محکمہ لائیو سٹاک و ڈیری ڈویلپمنٹ پنجاب نے تمام منصوبے مویشی پال حضرات، کسانوں، کاشتکاروں کی مشاورت سے بنانے اور ان پر عملدرآمد کے لئے اقدامات شروع کر دیئے ہیں تاکہ دودھ وگوشت کی پیداوار میں اضافہ یقینی بنایاجاسکے۔ ڈویژنل ڈائریکٹرمحکمہ لائیو سٹاک و ڈیری ڈویلپمنٹ فیصل آباد ڈاکٹر سید ندیم بدر نے بتایاکہ پہلے مرحلے میں مویشیوں، مرغیوں اور دیگر پرندوں و جانووں میں مہلک امراض کی روک تھام کے لئے وسیع پیمانے پر حفاظتی ٹیکے لگانے لگائے جا رہے ہیں اور متعدد علاقوں میں دوسرے مرحلے میں بھی خصوصی مہم جاری ہے۔

انہوں نے مذکورہ خصوصی مہم کے اغراض و مقاصد پر روشنی ڈالتے ہوئے کہا کہ ویکسی نیشن مہم کے مکمل ہونے سے پالتو جانور پالنے والے کسانوں کو بھی بے انتہا فائدہ ہو گا۔

(جاری ہے)

انہوں نے مزیدبتایا کہ محکمہ لائیو سٹاک کے تمام منصوبے کسانوں، کاشتکاروں اور عوام کی مشاورت سے ہی بنائے جائیں گے جن پر عملدرآمد کےلئے اعلیٰ سطح پراقدامات کئے جائیں گے۔ انہوں نے محکمہ کے افسران اور دیگر سٹاف کی شبانہ روز کوششوں اور ان کی کارکردگی کو سراہتے ہوئے کہاکہ محکمانہ کوششوں سے مقررہ اہداف حاصل کرنے میں مدد ملے گی اور ملک دودھ و گوشت کی پیداوار میں خود کفیل بھی ہو سکے گا۔ انہوں نے کہاکہ پالتوجانوروں کو بیماریوں سے بچانے کی مہم سے کسانوں اور کاشکاروں کے معاشی حالات بھی بہتر ہوں گے۔