دوستوں سے متعلق جگن کاظم کو بیان دینا مہنگا پڑ گیا

جگن کاظم کو ان کے بیان پر سوشل میڈیا پر ٹرولنگ کا نشانہ بنایا گیا

بدھ 19 فروری 2025 12:25

دوستوں سے متعلق جگن کاظم کو بیان دینا مہنگا پڑ گیا

لاہور(اُردو پوائنٹ اخبارتازہ ترین - این این آئی۔ 19 فروری2025ء)اداکارہ اور مارننگ شو کی میزبان جگن کاظم نے حفظان صحت سے متعلق ایک پروگرام میں اپنے ساتھی اداکاروں اور دوستوں کی عادات و اطوار سے متعلق بات کی تھی۔جگن کاظم نے شو میں شکوہ کیا تھا کہ ہم میں سے اکثر اپنی صحت کا خیال نہیں رکھتے اور ہماری کچھ بری عادات دوسروں کے لیے تکلیف یا کوفت کا باعث بن سکتی ہیں۔

جگن کاظم نے کہا کہ میرے ملنے جلنے والوں اور انڈسٹری کے دوستوں کے جسم سے بدبو آتی ہے۔اداکارہ اور میزبان نے بتایا کہ شادی کی ایک تقریب میں جاننے والے افراد ملے جن میں سے دو افراد ایسے تھے جنھوں نے گندگی کی مثال قائم کردی۔جگن کاظم نے کہا کہ ان دونوں کے جسم اور کپڑوں سے بہت بدبو آ رہی تھی۔ شاید کئی دنوں سے بال تک نہیں دھوئے تھے۔

(جاری ہے)

خشکی بھی نظر آ رہی تھی۔

میزبان جنگن کاظم نے مزید کہا کہ ان دونوں نے دانت بھی صاف نہیں کیے تھے۔ بات کرتے ہوئے ان کے منہ سے ناگوار بو آ رہی تھی۔جگن کاظم نے کہا کہ ہمیشہ ہی حفظان صحت کا خیال رکھنا چاہیے لیکن جب آپ کسی تقریب میں جارہے ہیں تو اس کا زیادہ اہتمام کرنا چاہیے۔اداکارہ نے یہ بھی کہا تھا کہ صاف ستھرائی کی عادات اپنانے سے ہماری شخصیت میں نکھار آتا ہے۔

دوسری جانب جگن کاظم کو ان خیالات پر سوشل میڈیا پر ٹرولنگ کا نشانہ بنایا گیا۔ صارفین نے کہا کہ میزبان اور اداکارہ کو اتنا بھی نہیں پتا کہ کون سی بات کہاں کرنی چاہیے۔ایک صارف نے کہا کہ چینل پر بیٹھ کر کسی کے بارے میں ایسی بات کرنا، ان کی بے عزتی کرنے کے مترادف ہے۔ایک اور صارف نے کہا کہ آپ کی باتیں اچھی ہیں لیکن آپ کا انداز اچھا نہیں اور آپ کو وہ واقعہ بتانے کی بھی ضرورت نہیں تھی۔متعدد صارفین نے کہا کہ شو کی میزبان کو کسی کے لیے بھی ججمینٹل نہیں ہونا چاہیے۔