پریٹی زنٹا 7 سال بعد فلمی پردے پر واپس آ رہی ہیں

پریٹی زنٹا کا مودی کی جماعت بی جے پی میں شمولیت کے سوال پر کرارا جواب

بدھ 30 اپریل 2025 12:20

پریٹی زنٹا 7 سال بعد فلمی پردے پر واپس آ رہی ہیں

ممبئی (اُردو پوائنٹ اخبارتازہ ترین - این این آئی۔ 30 اپریل2025ء)بالی ووڈ کی خوبصورت اداکارہ پریٹی زنٹا نے سوشل میڈیا پر ایک مداح کو بھارتیہ جنتا پارٹی میں شمولیت سے متعلق سوال پر کرارا جواب دیدیا۔معروف اداکارہ پریٹی زنٹا نے سوشل میڈیا پر سوال جواب کے آن لائن سیشن کے دوران ایک مداح نے ان سے بی جے پی میں شمولیت سے متعلق سوال کیا۔تاہم اداکارہ کو یہ سوال ایک آنکھ نہ بھایا اور برہمی کا اظہار کرتے ہوئے سوال کرنے والے مداح کو آڑے ہاتھوں لے لیا۔

پریٹی زنٹا نے کہا کہ معلوم نہیں کیوں لوگ دوسروں کی شناخت اور انتخاب پر اپنا فیصلہ مسلط کرنا چاہتے ہیں۔تاہم اگلے ہی روز اپنے سوشل میڈیا اکائونٹ پر ایک پوسٹ میں اداکارہ نے اس مداح سے معذرت بھی کر لی۔پریٹی زنٹا نے لکھا کہ مجھے افسوس ہے اگر میرا لہجہ سخت لگا ہو۔

(جاری ہے)

مجھے اس سوال نے ہیجان میں مبتلا کردیا تھا۔اداکارہ نے مزید کہا کہ ایک ماں ہوں اور بیرون ملک مقیم ہوں لیکن میں چاہتی ہوں کہ میرے بچے یہ نہ بھولیں کہ وہ بھارتی شہری بھی ہیں۔

پریٹی زنٹا نے کہا کہ میرے شوہر کسی مذہب پر یقین نہیں رکھتے لیکن ہم اپنے بچوں کی پرورش ہندو مذہب کے مطابق کر رہے ہیں۔اداکارہ نے افسوس کا اظہار کرتے ہوئے لکھا کہ مجھے ہر وقت اپنے زندگی کے فیصلوں کے لیے وضاحت دینا پڑتی ہے۔پریٹی زنٹا نے مزید کہا کہ میری خوشیوں کو بار بار سیاست سے جوڑا جا رہا ہے۔ مندر جانا، کمبھ میلے میں شرکت کرنا اور اپنی شناخت پر فخر کرنا سیاست میں شامل ہونے یا کسی پارٹی سے وابستگی کی علامت نہیں ہے۔

یاد رہے کہ پریتی زنٹا نے 2016 میں جین گڈ اینف سے شادی کی تھی اور 2021 میں سروگیسی کے ذریعے جڑواں بچوں کی ماں بنی تھیں۔علاوہ ازیں پریٹی زنٹا 7 سال بعد فلمی پردے پر واپسی آ رہی ہیں۔ وہ راجکمار سنتوشی کی فلم ’’لاہور 1947‘‘ میں سنی دیول اور شبانہ اعظمی کے ساتھ نظر آئیں گی۔اس فلم کو عامر خان پروڈیوس کر رہے ہیں۔