کاشتکار گندم کی فصل کوچوہوں سے متاثر ہونے سے بچانے کےلئے بر وقت اقدامات یقینی بنائیں،نظامت زرعی اطلاعات

بدھ 19 فروری 2025 16:39

فیصل آباد (اُردو پوائنٹ اخبارتازہ ترین - اے پی پی۔ 19 فروری2025ء) نظامت زرعی اطلاعات محکمہ زراعت کے ماہرین نے کاشتکاروں کو مشورہ دیا ہے کہ وہ گندم کی فصل میں موجود جڑی بوٹیاں تلف کرنے کی جانب خصوصی توجہ دیں جبکہ چوہوں کے حملے کو روکنے کےلئے بھی فوری و بر وقت اقدامات کی ضرورت ہے۔کاشتکاروں کی آگاہی کےلئے انہوں نے کہا کہ گندم کی جڑی بوٹیوں کا خاتمہ بہت ضروری ہے اور اگر سپرے کرنے کے باوجود بھی کہیں جڑی بوٹیاں رہ گئی ہوں تو ان کی تلفی کی جانب خصوصی توجہ دی جائے۔

انہوں نے کہا کہ گندم کی فصل پر چوہوں کے حملے کی صورت میں ان کی تلفی کےلئے زنک فاسفائیڈ کی گولیاں یا ڈیٹیا گیس کی ٹکیاں استعمال کی جائیں۔انہوں نے کہا کہ گندم پر سست تیلے کا حملہ بھی ہو سکتا ہے جس کے مارچ کے آخر تک شدت اختیار کرنے کا خدشہ ہوتا ہے۔

(جاری ہے)

انہوں نے کہا کہ سست تیلے کے خلاف زرعی زہریں استعمال نہ کی جائیں کیونکہ اس سے جہاں برے اثرات مرتب، ماحول آلودہ اور انسانی صحت کے مسائل پیدا ہو سکتے ہیں وہیں مفید کیڑے بھی ہلاک ہو سکتے ہیں۔

انہوں نے کہا کہ کھیت کے گرد پرالی یا درختوں کے گرے ہوئے پتوں کے ڈھیر سے طفیلی کیڑوں کی نشو ونما کے باعث سست تیلے کی تعداد کو کم کیا جا سکتا ہے۔ انہوں نے کہا کہ طفیلی کیڑے سست تیلے کو کھاکر ختم کرنے کی صلاحیت رکھتے ہیں۔انہوں نے کہا کہ قدرتی بارش بھی گندم کی فصل سے سست تیلے کے خاتمہ کا ذریعہ بن سکتی ہے۔