پاکستان میں روانڈا کی سفیر ہریریمانا فاتو کا سیالکوٹ چیمبر آف کامرس اینڈ انڈسٹری کا دورہ

سیالکوٹ (اُردو پوائنٹ اخبارتازہ ترین - اے پی پی۔ 24 فروری2025ء) پاکستان میں روانڈا کی سفیر ہریریمانا فاتو نے سیالکوٹ کے برآمد کنندگان پر زور دیتے ہوئے کہا کہ وہ آگے آئیں اور روانڈا کی غیر استعمال شدہ بین الاقوامی تجارتی منڈیوں کو تلاش کریں تاکہ روانڈا اور پاکستان کے درمیان مضبوط باہمی تجارت کو فروغ دیا جا سکے۔یہ بات انہوں نے آج یہاں سیالکوٹ چیمبر آف کامرس اینڈ انڈسٹری (ایس سی سی آئی) میں منعقدہ سیالکوٹ کے ایکسپورٹرز کے ایک اہم اجلاس سے خطاب کرتے ہوئے کہی۔

پاکستان میں روانڈا کی سفیر ہیریمانا فاتو نے پاکستان اور روانڈا کے درمیان دوطرفہ تعاون کے امکانات کو اجاگر کرتے ہوئے تعاون بڑھانے کی ضرورت پر بھی زور دیا۔ انہوں نے کہا کہ روانڈا دوطرفہ تجارتی تعلقات کو مزید مضبوط بنانے کے ساتھ ساتھ دونوں ممالک کے درمیان کاروباری روابط کو مزید مستحکم بنانے کا خواہاں ہے۔

(جاری ہے)

انہوں نے کہا کہ تجارتی وفود کے تبادلے سے دونوں ممالک کے درمیان دوطرفہ تجارتی اور کاروباری تعلقات کو مزید فروغ دینا چاہیے۔

پاکستان کی چائے کی درآمد پر تبصرہ کرتے ہوئے انہوں نے انکشاف کیا کہ پاکستان میں آنے والی 45 فیصد چائے روانڈا سے آتی ہے۔انہوں نے کہا کہ روانڈا 2035 تک درمیانی آمدنی والا ملک اور 2050 تک اعلیٰ آمدنی والا ملک بننے کی خواہش رکھتا ہے۔ انہوں نے ریمارکس دیئے کہ روانڈا اور پاکستان، باسٹھ سال پر محیط دیرینہ تعلقات کے ساتھ، تجارت، صحت اور سرمایہ کاری سمیت مختلف شعبوں میں فعال طور پر تعاون کر رہے ہیں۔

سیالکوٹ چیمبر آف کامرس اینڈ انڈسٹری (ایس سی سی آئی )کے صدر اکرام الحق نے اپنے خطبہ استقبالیہ میں کہا کہ دوطرفہ تجارت کو بڑھانے کے لیے دونوں ممالک کے درمیان براہ راست کاروباری روابط بہت ضروری ہیں۔ صدر ایس سی سی آئی نے سفیر پر زور دیا کہ وہ روانڈا کی کاروباری برادری کو سیالکوٹ کی بنی ہوئی مصنوعات براہ راست سیالکوٹ سے خرید نے کی ترغیب دیں گی ۔

انہوں نے مزید کہا کہ دونوں ممالک کے درمیان ایف ٹی اے (آزاد تجارتی معاہدہ) تجارتی وفود کے تبادلے، تجارتی کرایوں کے انعقاد اور مشترکہ منصوبوں کے ساتھ دو طرفہ تجارت کو فروغ دینے کے لیے ضروری ہے۔ایس سی سی آئی کے صدر کا کہنا تھا کہ سیالکوٹ ایک صنعتی سیٹ اپ کی نمائندگی کرتا ہے جو خصوصی مصنوعات تیار کرتا ہے جو پوری دنیا کے اعلیٰ برانڈز اور خریداروں کو فراہم کی جاتی ہیں، ہم کھیلوں کے سامان، آلات جراحی، چمڑے کی مصنوعات اور ہر قسم کے دستانے، ٹیکسٹائل کی اشیاء، کھیلوں کے لباس، مارشل آرٹس یونیفارم اور لوازمات، موسیقی کے آلات، باورچی خانے کے سامان ، ہولو ویئر، شکار کے چاقو، ٹیبل کٹلری/فلیٹ ویئر اور ملٹری یونیفارم تیار کرتے ہیں۔

انہوں نے کہا کہ سیالکوٹ سے تیار کردہ فٹ بال، فیلڈ ہاکی سٹکس، کرکٹ گیئر اور باکسنگ کے دستانے اولمپکس اور ورلڈ کپ سمیت بین الاقوامی کھیلوں میں استعمال ہوتے ہیں۔