چارہ جات کی فی ایکڑ پیداوار میں خاطر خواہ اضافہ کیلئے منصوبہ بندی وقت کی اہم ضر ورت ہے، ڈائریکٹر چارہ جات

بدھ 26 فروری 2025 12:40

فیصل آباد (اُردو پوائنٹ اخبارتازہ ترین - اے پی پی۔ 26 فروری2025ء) پاکستان کی معیشت کا زیادہ تر انحصار زراعت پر اور زراعت میں لائیوسٹاک کا 55فیصد حصہ ہے جبکہ جانوروں کی خوراک کا سب سے بڑا ذریعہ سبز چارہ ہے اسلئے چارہ کی معیاری اقسام کی وافر مقدار میں دستیابی ہر صورت یقینی بنانے کیلئے ہرممکن اقدامات کئے جارہے ہیں نیز چارہ جات میں کمی کی بنیادی وجوہات میں کسانوں کی سبز چارہ کی ترقی دادہ اقسام کے بیج اور جدید پیداواری ٹیکنالوجی سے عدم واقفیت ہے لیکن ہم جدید زرعی ٹیکنالوجی اپنا کر چارہ کی پیداوار میں دیگر ممالک کی طرح خاطر خواہ اضافہ کرسکتے ہیں۔

زرعی تحقیقی ادارہ کے ڈائریکٹر چارہ جات محمد سلیم نے بتایا کہ تجربات سے ثابت ہے کہ اگر ہم زمین کا صحیح انتخاب وتیاری، اچھا بیج، مناسب اور متناسب کھادوں کا استعمال، بروقت کاشت، برداشت ودیگر زرعی عوامل اور ماہرین کی سفارشات پر عمل کریں تو چارہ جات کی فصلوں کی فی ایکڑ پیداوار میں بھی نمایاں اضافہ کرسکتے ہیں۔

(جاری ہے)

انہوں نے بتایا کہ چارہ کی فی ایکڑ پیداوار میں کمی کی وجہ نئی اقسام کا بیج اور جدید فنی مہارتوں کو بروئے کار نہ لانا ہے علاوہ ازیں غذائی اور نقد آور فصلوں کو مدنظر رکھتے ہوئے چارہ کی پیداوار میں اضافہ کیلئے ہم رقبہ میں اضافہ نہیں کرسکتے۔

انہوں نے کہا کہ وقت کی ضر ورت ہے کہ ہم ایسی منصوبہ بندی کریں جس سے چارہ جات کی فی ایکڑ پیداوار میں خاطر خواہ اضافہ ہوسکے۔