سندھ زرعی یونیورسٹی ٹنڈوجام میں آئی ٹی نمائش اور جاب فیئر کا انعقاد

حیدرآباد (اُردو پوائنٹ اخبارتازہ ترین - اے پی پی۔ 27 فروری2025ء) سندھ زرعی یونیورسٹی ٹنڈوجام میں آئی ٹی نمائش اور جاب فیئر کا انعقاد کیا گیا۔سندھ زرعی یونیورسٹی کے انفارمیشن ٹیکنالوجی سینٹر کے زیرِاہتمام منعقدہ آٹھویں سالانہ ایگری ٹیک فائنل ایئر پروجیکٹ(ایف وائی پی)، نمائش اور جاب فیئر میں گریجویٹس نے سافٹ ویئر، ایپلیکیشنز، مصنوعی ذہانت (اے آئی)، ایگرو ٹیک، موبائل ایپلیکیشنز، سائبر سکیورٹی، انٹرنیٹ آف تھنگز (آئی او ٹی) اور جدید آئی ٹی ماڈلز پیش کیے۔

کل 33 منصوبوں میں 16 ایگری ٹیک، 4 اے آئی اور ہارڈویئر، 5 سائبر سکیورٹی، 4 ایپلیکیشن بیسڈ اور 4 آئی او ٹی پر مبنی حل شامل تھے۔نمایاں منصوبوں میں بحالی کے لیے ایک اسمارٹ چیئر اور گلوکوٹیک ڈیوائس شامل تھی، جو گلوکوز کی سطح کی نگرانی کے لیے تیار کی گئی ہے۔

(جاری ہے)

یہ سرگرمی نائیس حیدرآباد، آئی کریئیٹیو کراچی، ایم آئی ٹی حیدرآباد، آئی سی ایم اے، اور بزنس انکیوبیشن سینٹر کے تعاون سے منعقد کی گئی جبکہ آئی ٹرپل ای اسٹوڈنٹ برانچ نے بھی اس میں تعاون کیا۔

جاب فیئر میں کراچی اور حیدرآباد کی نجی کمپنیاں شریک ہوئیں تاکہ آئی ٹی گریجویٹس کو روزگار کے مواقع فراہم کیے جا سکیں۔ اس موقع پر وائس چانسلر ڈاکٹر الطاف علی سیال نے کہا کہ آئی ٹی کے شعبے میں ہونے والی تیز رفتار ترقی نے میڈیکل، زراعت، انجینئرنگ، لائیو اسٹاک، مینوفیکچرنگ اور مارکیٹنگ سمیت مختلف صنعتوں میں اہم کردار ادا کیا ہے۔ انہوں نے یونیورسٹی کے طلبہ کی جانب سے تیار کردہ منصوبوں کے اعلیٰ معیار کی تعریف کرتے ہوئے کہا کہ طلبہ کو اپنے ماڈیولز، انوویشنز اور آئیڈیاز کو کمرشل سطح پر متعارف کرانا چاہیے۔

اس سلسلے میں یونیورسٹی کا ادارہ اورک اور دیگر متعلقہ ادارے ہر ممکن معاونت فراہم کریں گے۔فیکلٹی آف ایگری کلچرل سوشل سائنسز کے ڈین، ڈاکٹر اعجاز علی کھوھارو نے کہا کہ انفارمیشن ٹیکنالوجی نے چند دہائیوں میں دنیا کو بدل کر رکھ دیا ہے، اور اب عالمی مارکیٹ محض ایک کلک کی دوری پر ہے، جس سے ترقی کے بے شمار مواقع پیدا ہو رہے ہیں۔ انفارمیشن ٹیکنالوجی سینٹر کے ڈائریکٹر ڈاکٹر میر سجاد تالپور نے بتایا کہ طلبہ نے صحت، زراعت، مشین لرننگ اور موبائل ایپلیکیشنز میں بہترین منصوبے تیار کیے ہیں اور ہمارے سینٹر کے گریجویٹس ملکی و عالمی سطح کے کئی مقابلوں میں کامیابی حاصل کر چکے ہیں۔

تقریب کی میزبانی ڈاکٹر محمد یعقوب کوندھر نے کی، جبکہ دیگر شرکاء میں ڈاکٹر مختار احمد میمن، ڈاکٹر ذوالفقار علی مہر، ڈاکٹر محمد پنجل بٹ، طلبہ اور صنعت سے وابستہ افراد شامل تھے۔ دوسری جانب مختلف سافٹ ویئر اور آئی ٹی کنسلٹنگ کمپنیوں نے جاب فیئر میں اسٹالز لگا کر گریجویٹس کو ملازمت اور انٹرن شپ کے مواقع کے بارے میں آگاہی فراہم کی۔